Reportajen Adroaldo “Saretukau”
Presidente Autoridade Região Administrativo Especial Oe-cusse Ambeno (RAEOA), Arsenio Paixão Bano husu formandu estudante no juventude sira tuir formasaun jornalizmu sidadania no seguransa dijitál, ne’ebé fasilita hosi média Neon Metin, atu aplika iha sira nia-an, hodi publika no hakerek informasaun pozitivu sira, inklui halo promosaun ba fatin turizmu, no atividade ne’ebé bele dada no atrai ema atu vizita liu tan Oe-cusse, ne’ebé iha impaktu boot ba ekonomia doméstika.
Prezidente RAEOA Arsenio, husu atu formandu sira aproveita di-di’ak formasaun durante loron rua nian hodi aprende netik buat foun ruma hosi formasaun ne’e. Nia hatutan, formasaun ne’e konabá jornalizmu sidadania, tan ne’e mak aprende hodi hakerek substánsia pozitivu sira, tanba ko’alia ne’e fasil, maibé hakerek mak tenki hakerek ida ne’ebé pozitivu no hodi atrai ema.
Nia hatete iha RAEOA se ita hotu hakerek buat la di’ak de’it, ema la mai vizita ita nia rai, se ema la mai vizita ita nia rai, ita nia inan-aman sira ne’ebé hakiak animal, kuda modo ka hala’o atividade agrikultura, sira nia sasan la folin tanba ema la iha atu sosa.
“Tanba ne’e jornalizmu, buat hakerek importante, buat hakerek pozitivu, hanesan ita ne’e pertense grupu boot ida Oe-cusse ne’e, fa’an ita nia rai ne’e (promosaun), halo marketing, publisidade buat di’ak para ema mai, kuandu ema mai kan nia presiza han, se nia presiza han modo, inan-aman sira kuda modo ne’e, modo laku (folin), sira hakiak (animal) ne’e laku, sira halo loja (fa’an), keos ki’ik-ki’ik ne’e laku, sira be loro-loron lori tum-tum ema sa’e, sira iha mikrolete laku,” Prezidente RAEOA dehan enkoraja partisipante sira, iha ámbitu formasaun ne’ebé organiza hosi média Neon Metin, iha sentru juventude RAEOA, Sesta, 10/06.
Tuir Prezidente RAEOA nia haree publikasaun sira iha Facebook, ema barak ko’alia aat Oe-cusse, maibé Oe-cusse iha dezenvolvimentu ida di’ak liu, nia dehan ema “ko’alia aat de’it Oe-cusse, Oe-cusse estrada di’ak liu Maliana, estrada di’ak liu Viqueque, maibé Oe-cusse la puas (la satisfas), halo buat sasan bar-barak, aeroportu iha, aviaun iha, eskola ita halo barak liu fali rai boot, rekrutamentu pegawai (funsionáriu) barak liu, iha ospital iha fatin hotu-hotu barak liu, maibé Oe-cusse sempre la puas, Oe-cusse hakarak saída?”, nia dúvida, tanba ne’e nia husu atu liu hosi formasaun ne’e, formandu sira bele aproveita hodi bele hakerek buat ne’ebé iha impaktu pozitivu.
