Reportajen Joanna Casamiro
Kauza husi anin bo’ot iha loron 9 Outubru tinan ne’e, Estraas tiha veteranu Domingo Soares ho naran kodigu Miku nia uma iha Aldeia Lenuk Hun, Suku Camea, Postu Administrativu Cristo Rei, oras ne’e Domigos hamutuk ho nia fen, ho oan nain 8 no mós beoan ida, toba deit iha dapur laran durante fulan ida liu ona.
Domingos Soares sai afetadu ba dezastre naturais, iha fulan Outubru, anin makaas, no sobu tiha uma, tanba uma ne’e mós airin malahuk hotu ona, kalen fruzin no fó ameasa tebes ba vida familia nian, bainhira toba iha laran.
“iha loron 09 Outubru 2022, anin boot sobu tiha ha’u nia uma. Tanba ne’e, ha’u ho ha’u nia kaben nomos familia sira toba de’it iha dapur durante fulan ida resin ona, tanba uma ne’e fó ameasadu tebes atu tohar no monu tun ona, tanba ai sira ne’e malahuk no dodok hotu ona, “ hatete Domingos Soares, ba Neon-Metin iha nia rezidensia Lenuk Hun, Sabadu 12/11/22
Nia haktuir uma ne’e hari’i durante tinan naruk ona uma ne’e uluk harii ne’e taka de’it ho du’ut, hafoin troka fali ba kalén iha tempu ukun aan, bainhira hetan osan nu’udar veteranus.
“Iha tinan 1988 liu ba ha’u nia uma taka ho du’ut, bainhira iha ukan aan ne’e maka ha’u nia uma troka fali ba kalén no halo iha tinan 2011, halo ho Kalen ne’e, tanba ha’u mós hetan ha’u nia direitu nu’udar veteranu ho númeru 4 a 7 ninian, mabe udan ho anin sobu tiha ha’u nia uma ona. Oras ne’e, ha’u ho familia hamutuk na’in walu (8), hanesan ha’u ho ha’u nia kaben hamutuk ho oan na’in ha’at inklui beioan ida ho fulan sia (9) ne’ebé hela iha uma ne’e no to’o agora ami toba de’it iha dapur tanba seida’uk halo konstrusaun ba uma refere,” hateten Domingos
Alende ne’e nia mós koalia katak, uma aat maibé seidauk iha apoiu ruma husi governu ka grupu balun, ho nune’e hakarak ka lakohi tenki toba iha dapur de’it bainhira iha osan maka bele hadi’a fila fali para bele hela ka toba ho seguru.
Nia salienta autoridade suku sira mai ona foti dados no hasai foto hodi hato’o ba iha Ministériu Solidariedade Sosiál no Inkluzaun (MSSI), maibé to’o agora seida’uk iha notifikasaun husi ministériu relevante hodi tun mai hare’e.
