Reportazen David da Costa Gusmao*
Ministeriu Saude (MS) rezista tan transmisaun komunidade nain ida iha aldeia Onu Laran. Liu hosi konferensia imprensa Koordenador Forsa-Tarefa ba Prevensaun no Mitigasaun Surtu COVID-19 iha Timor-Leste, Dr. Rui Maria de Araújo informa ba jonalista sira katak ohin Ministeiru Saude rejista tan kazu foun ida, transmisaun lokal (komunidade) iha agrupamentu/cluster Klauhale ida ne’e mak daet ona iha aldeia Onu-Laran, Suku Maudemu, postu administrativu Tilormar no iha posiblidade mak daet ka espailla ona ba iha Suai vila.
Nia esplika iha loron 25 ho 26 ekipa konjunta vijilansia epidemiolójika no laboratoriu, kontinua halo rastreiu ka swab test iha aldeia Klauhalek, suku Belulik leten, postu administrativu Fatumea, Munisipiu Covalima no rekollla amostra husi ema ne’ebe kontaktu-besik ho kazu primariu klauhalek.
“Iha prosesu rastreiu ba kontaktu-besik ho KPK horiseik, ami hetan informasaun adisionál katak KPK halo mós kontaktu ho ninia belun balu iha Tilomar. Hafoin buka tuir, ekipa hetan duni sira hafoin halo análize laboratóriu, hetan rezultadu pozitivu ida nain 1”, dehan Dr. Rui ba jornalista sira iha Centru Integradu Jestaun Krize (CIJK) iha CCD, Merkadu Lama, 27/02.
Nia haktuir iha kazu konfirmadu foun ida ne’e, mane tinan 42, Pasiente ne’e asintomatiku (ka laiha sinal), serbisu nudar estensionista, hela iha aldeia Onu-laran, Suku Maudemu, Postu Administrativu Tilomar, halo kontaktu ho KPK entre loron 11 ho 13 Fevereiru 2021.
Pasiente ne’e inform aba ekipa vijilansia katak seidauk halo viajen sai husi Covalima, maibé iha kontestu hala’o ninia knaar nudar estensionista, nia halo kontaktu ho kolega serbisu ho mós superior iha serbisu municipal agrikultura Covalima, inklui mós ho populasaun balun iha Tilomar no Fatumea.
“Kazu foun ida ne’e hamosu indikasaun katak transmisaun lokal iha agrupamentu/cluster Klauhalek, mak da’et tutan ka espalla ona to’o aldeia Onu-laran, Suku Maudemu Tilomar no iha mós possibilidade mak da’et ka espalla ona iha Suai vila, ho fatin seluk tan iha Covalima nia laran”, nia subliña
Nia haforsa tan ekipa konjunta husi vijilánsia epidemiolójika nivel nasionál, laboratoriu nasionál saúde, Servisu Munisipal Saúde hamutuk ho autoridade administrativa Covalima, ne’ebé integra iha Unidade Territórial CIGC-SS, MunisipiuCovalima nian, oras ne’e dadaun hatun ekipa 4, hodi buka-tuir ona ema hotu ne’ebé halo kontaktu-besik ho kazu foun ida ne’e.
*(David da Costa Gusmao nudar estudante UNTL ne’ebe halo estajiu iha Neon Metin)
