Reportazen David da Costa Gusmao*
Relasiona ho kazu pozitivu COVID-19 ne’ebe mak publika iha media Sosial (Facebook ho WhatsApp) katak estudante ida iha eskola Sekundadaria Liquisa no funsionariu Ministeriu Obras Publika (MOP) ne’ebe dehan pozitivu COVID-19 informasaun sira ne’e la los (hoax)
Liu hosi konfenrensia imprensa, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Araujo hateten katak labele fiar informasaun sira iha media sosial, maibe fiar mak iha sala situasaun Centro Integradu Jestaun Krize (CIJK).
“Informasaun ne’ebé loron rua nia laran sirkula sai iha média sosiál, kona-ba estudante iha Liquiça, no funsionáriu obras públikas ne’ebé dehan pozitivu COVID-19, informasaun hirak ne’e hotu la lo’os”, dehan Dr. Rui iha CIJK iha CCD Merkadu Lama, 27/02.
Nia apela mós ba populasaun Timor-Leste tomak, atu nafatin matan-moris neon nain, pratíka nafatin medida sira ne’ebé iha ona uza maskara, fase liman beibeik ho sabaun ka dezinfetante ruma, wainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak, hamrik ka tur do’ok husi ema seluk, mínimu metru ida ho balun.
*(David da Costa Gusmao nudar estudante UNTL ne’ebe estajiu iha Neon Metin)
