Reportazen Zevonia Vieira
Maskra sai nesesidade importante ida bainhira pandemia Covid-19 daet iha mundo tomak, iha fulan kotuk bainhira Ministeriu Saude anuncia ema ida positivu virus Corona, ema hotu buka dalan hodi hola maskra no halo maskra rasik hodi preven hosi virus Corona.
Maskra tipu oinsa mak bele efetivu atu ema bele prevene an hosi virus Corona, ho maskra N95 deit mak bele efetivu hodi prevene an?
Portavoz Centru Integradu Jestaun Krize [CIJK], Dr. Sergio Lobo hatan ba Neon Metin liu hosi konferensia imprensa hatan katak modelnu maskra ne’e iha oin tolu, hanesan maskra Cirúrgicas, maskra N95.
“Ba ita sira ne’ebe babain no infermeira ne’ebe halo konsulta ba moras, babain ne’e uza maskra Cirúrgicas, la presiza maskra N95. Iha kondisaun no kriteria uza maskra, bainhira uza ona maskra, liman labele kaer ka bok bebeik maskra bainhira liman foer, tanba bele daet ba maskra ne’e. Depois kuandu uza maskra tenke fase liman bebeik”. Esplika Dr. Sergio Lobo iha centru media CDD, 05/03.
Dr.Sergio hatutan importante liu kada oras 3 tenke truka maskra, tanba bainhira maskra ne’e kona kosar ka bokon ona, nia iha potensia atu akapta bateria.
Tuir Dr. Sergio esplikasaun maskra tipu N95 ne’e ba ema sira ne’ebe halo koidadu spesiais, prozemplu halo konsulta ba pasiente, bainhira kaer nia ibun hatama aimoruk ka sasan ba ibun laran, “ida ne’e mak tenke koidadu no presiza protesaun, tanba virus ne’e mai hosi kaben ne’ebe suli hosi ibun laran. Ba ema babain ne’ebe laos kona virus Corona bele uza masker Cirúrgicas”.
Tuir referensia ne’ebe mak dotor internasional sira esplika katak, lalaok diak liu hodi proteje an mak tenke moris hijiene katak sempre fase liman bebeik, mantein sistema imunolojiku, han hahan ne’ebe saudavel, consume vitamina, modo tahan no ai-fuan
Konaba maskra fo prioridade liu ba ekipa mediku, ba ema sira sintomas ka ema sira ne’ebe iha hela fatin publiku.
Hodi prevene an hosi virus Corona, mediku sira fo preferensia hodi uza maskra ho tipu Cirúrgicas no N95 no tenke tuir regra ne’ebe mak parte saude sira hatoo
