Reportajen Umbelina dos Reis
Assosiasaun Jornalista Timor Lorosa’e (AJTL) hamutuk ho Konsellu Imprensa (KI) realiza diskusaun Editor Club ho tema “Liberdade Imprensa no Liberdade Expresaun iha Ameasa Laran.” Ba ida ne’e, Konselleiru Konsellu Imprensa hatete, hosi diskusaun refere oinsá haree ba direitu jornalista no direitu independénsia editorial média nian, oinsá ameasa no intervensaun polítika no ekonomia iha redasaun.
Membru Konselleiru KI, Francisco Ximemes Belo hateten, relasiona ho tópiku ba loron ohin, liberdade imprensa no liberdade expresaun no produtu jornalístiku iha Timor-Leste di’ak no ranking númeru 1 iha Sudeste Aziátiku.
“Maibé dezafiu boot ne’ebé ita hasoru nafatin ne’e mak oinsá kualidade produtu jornalístiku nian, liberdade imprensa ita ukun liu, maibé kualidade ne’e nafatin iha dezafiu no pontu krusial nia laran, nune’e presiza dedika aan no servisu másimu.” Dehan Membru Konsileiru Konsellu Imprensa, Fransisco Ximenes Belo, iha abertura, iha Edifísiu Konsellu Imprensa Kintal Boot, sesta-feira, 21/09.
Nia informa, foka ba liberdade imprensa no expresaun sei iha ameasa nia laran, maibé importante liu ne’e mak oinsá ameasa, intervensaun polítila no ekonomika iha redasaun, tanba da-dauk ne’e ita hatene katak Sekretariu Estadu Komunikasaun Sosial (SEKOMS), komesa organiza ona oinsá fahe subsídiu ba média sira no média sira mos organiza malu oinsá ba simu subsídiu. Ne’e dúvida ne’ebé bele halo potesia intervensaun direita no indireita ba independénsia editorial.
Nia dehan, subvensaun ne’ebé mai hosi estadu no governu ne’e tenki mai ho laran mak apoiu, la’os halo intervensaun ba independénsia média no jornalista sira, tanba situasaun dezde restaurasaun independénsia, dezafiu no preokupasaun mundu jornalizmu nian ne’e la’os intervensaun F-FDTL, PNTL, ka Prokurador Jeral, maibé intervensaun poder politíka no ekonomika, liga mos ba média na’in sira iha onestidade ba liberdade imprensa no liberdade espresaun ka lae? Ba independénsia editorial no jornalista sira.
“Tanba ha’u akompaña iha grupu Facebook no WhatsApp, média sira komesa organiza malu ona oinsá mak hetan subvensaun iha SEKOMS. Tanba bainhira jornalista no média ida monu ba problema hetan notifikasaun ne’e la organiza malu, oinsá mak apoiu no korajen ba malu, maibé iha informasaun konabá subsídiu ne’e sira organiza malu lalais loos, sente ida ne’e dezafiu boot nafatin.” Nia preokupa.
Konsileiru ne’e konklui, objetivu hosi diskusaun ne’e oinsá hare ba direitu independénsia jornalista sira nian, no direitu independénsia editorial média nian ne’e to’o ona iha ne’ebé?
