Reportajen Joselina dos Santos
Asosiasaun Jornalista Timor Lorosa’e (AJTL), servisu hamutuk ho Konsellu Imprensa (KI) Timor-Leste hodi realiza Diskusaun Editor Club ho tema “Liberdade Imprensa no Liberdade Expresaun Iha Amiasa nia laran” ba jornalista sira hodi nafatin hala’o servisu profisional no lalika tauk bainhira hetan amiasa husi parte seguransa ka ministeriu publiku liga ho direitus umanus.
Iha diskusaun ne’e, Sekretariu Jeral AJTL, Acacio Pinto hatete Iha tinan hirak liu ba Jornalista no Xefi Redasaun husi media Independete hetan investigasaun husi PCIC, entaun iha ne’eba AJTL ho nia pozisaun nafatin defende jornalista nia kazu. Aleinde mos Xefi Redasaun Hatutan.com halo kobertura kona-ba Set-top Box Books hetan mos intervensaun nomos deklarasaun husi Ministeriu Publiku ikus mai kazu ida ne’e sei kontinua nafatin. Tanba ne’e AJTL preokupa ho amiasa sira ne’e atu nafatin halo diskusaun klean ho jornalista hotu no bolu espertu sira ne’ebe iha área direitus umanus atu foka oinsa jornalista halao nia servisu profisional no kritiku.
“Iha tempu Liberdade ida ne’e ita direitu maximu atu kontrola ba ukun-na’in sira ne’ebe durante ne’e halao nia knaar hanesan lider iha ita-nia nasaun, ho ida ne’e mak AJTL nia hanoin atu halo atividade ida ne’e espera katak orador sira bele halo diskusaun ho klaru no klean ba jornalista sira atu labele tauk no kontinua ba oin”, dehan, Reprezentante Acacio Pinto iha Salaun Konferensia Imprensa, Quintal Boot Balide, 22/09.
Iha fatin hanesan, Diretór Ezekutivu Interinu Konsellu Imprensa, António Dias hatutan, importante tebes KI koperasaun ho Asosiasaun Jornalista Timor Lorosa’e (AJTL), no Asosiasaun sira seluk tanba asosiasaun jornalista mak sai parseiru importante ba vida Konsellu Imprensa nian, nune’e sempre loke koperasaun ho Asosiasaun Jornalista sira hodi haforte jornalista sira nia servisu profisional.
“Ita-nia topiku kona-ba “Liberdade Imprensa no Liberdade Expresaun Iha Amiasa Nia Laran” tanba durante ne’e ita terlena ho ita nia rqngkin ba liberdade imprensa no liberdade expresaun ne’ebe aas, tan ne’e tenke halo diskusaun klean katak amiasa sira ne’e mai husi ne’ebe. Atu halo oinsa ita hamutuk hodi mantein rangkin ka diak liu tan. Nune’e Konsellu Imprensa nakloke hodi servisu hamutuk Asosiasaun sira importante atu reflete liberdade imprensa katak ha’u nia liberdade lia loos sei la mate no kabe ba ema hotu“, dehan diretór interinu António Dias.
