Reportajen Adroaldo “Saretukau”
Liu hosi eventu debate ne’ebé organiza hosi Timor-Leste Debating Group (TLDG) ba da haat, iha Salaun Universidade Católica Timorense (UCT), hodi komemora loron Masakre Santa Cruz no loron Nasional Juventude, estudante mak partisipa iha debate hato’o sira nia hanoin hodi enkoraja feto maluk sira atu envolve iha atividade hotu no espresa sira nia hanoin iha aspetu hotu tanba feto mos iha direitu hanesan ho mane iha sosiedade ida nia laran.
Estudante Universidade Nacional Timor Lorosa’e (UNTL), Cristina Ximenes enkoraja tebes feto sira atu labele moe no ta’uk tuir aktividade hanesan debate mak organiza hosi TLDG no aktividade sira seluk. Nia dehan, feto tenki ativu, no labele ta’uk espresa nia hanoin, ativu iha sosiedade, hodi labele sente katak feto labele maibé feto bele mos iha aspetu hotu.
“Liga ho loron juventude nian, ita feto sira, ita tenki hamriik, labele tuur de’it, tenki explora mundu ne’e, tenki explora sosiedade sira ne’e, mundu ne’e iha buat barak mak tenki explora, buat barak tebes kapas ne’ebé ita feto tenki explora, liu-liu iha área sosiedade ne’e nia laran, feto tenki ser brani liu tan atu hasai sira nia lian, labele ta’uk tanba ita moris iha mundu iha modernizasaun, la iha ema ida mak sei fo tan presaun mai ita, ita bele hamriik, ita bele ko’alia, ita bele espresa, ita iha liberdade atu partisipa iha aktividade hotu-hotu,” dehan estudante Cristina hafoin debate, iha UCT, Balide, Sábadu, 12/11.
Cristina Ximenes, espresa nia sentimentu hodi prova aktividade debate mak nia tuir, nia sente kontente no orgullu tebes tanba liu hosi debate ne’e halo mudansa ba nia aan iha área diskursu públiku no oinsá atu dezenvolve ni-nia hanoin krítiku ba isu ne’ebé sosiedade enfrenta.
“Iha ne’e rasik abilidade ne’ebé ita joven ida, liu-liu Timoroan ida tenki iha, atu nune’e bele sai ativu iha ita nia sosiedade, ita bele haree buat sira ne’e, wainhira iha buat ruma ne’ebé ladun los ita la ta’uk atu espresa, atu hasai ita nia hanoin,” nia dehan.
Iha parte sorin estudante UCT, Zelilia Maria Fraga Marçal, dehan loron juventude ne’e, nia sente feto nia papél importante tebes, liu-liu halo desizaun, tanba feto iha empatia nomos iha direitu hanesan ho mane sira, ho nune’e bele espresa sira nia sentimentu, sira nia hanoin konabá isu sira ne’ebé iha sira nia sorin.
“Feto nia papél importante tebes iha sosiedade, nune’e liu hosi ne’e ita mos bele empodera feto, atu nune’e enkoraja sira, la’os hanoin de’it isu ne’ebé akontese, sira ta’uk ou sira sente sira nia aan iha mane nia okos maibé hanesan feto ita mos tenki kontribui no fo sai ita nia ita nia talentu, ita nia matenek, para bele inklui iha sosiedade ein termus de foti desizaun,” dehan Zelilia.
