Reportajen Adroaldo “Saretukau”
Enkaregadu Negósiu Estadus Unidus Amérika (EUA) Tom Daley fó pose ba voluntáriu Amerikanu na’in 17 husi Peace Corps, ne’ebé sei serbí iha munisípiu sira hanesan Bobonaro, Liquiça, Ermera no Manatutu iha tinan rua nia laran, hodi promove edukasaun lian Inglés no dezenvolvimentu ekonomia komunitáriu. Atividade refere ho prezensa mos husi Prezidente Repubika, Dr. José Ramos-Horta no governu Timor-Leste nia membru senior sira.
Iha diskursu Diretór Korpu da Pas ka Peace Corps, Jamie Fouss, nia relembra fali kona-ba buat balu ne’ebé hakat liu ona, durante fulan rua ho balu nia laran. Nia lembra bainhira hasoru voluntáriu Korpu da Pas sira tun hosi aviaun, sira kole tanba viajen dook, maibé kontente tanba konsege to’o iha sira nia rai destinasaun Timor-Leste. Nia hato’o katak sira haksolok sira nia aventura foun, mabé fuan taridu oi-tuan ba saída mak sei mosu iha oin.
“Ba kandidatu voluntáriu Grupu 11, ha’u hato’o ha’u nia parabéns ba konklui ona formasaun pre-service Intensivu durante semana sanulu no ofisialmente hahú serbi iha Korpu da Pas,” dehan Diretor Korpu da Pas, iha serimónia pose voluntáriu Korpu da Pas iha Embaixada Amérika, Praia dos Coqueiros, Kinta-feira, 30/03.
Diretor ne’e gosta tebes voluntáriu Korpu da Pas sira nia aula prátika hanorin ensinu báziku no sekundáriu no mos grupu foinsa’e sira, alein de iha eakola. Nia haree sira aprezenta lisaun gramátika hodi dada estudante sira nia atensaun kapas los. “Ha’u hares ita boot sira di’ak loos ho sira, bolu sira uza sira nia naran, enkoraja sira atu ko’alia, no ho pasiénsia hein sira atu habrani an atu hatan ita nia pergunta.” Fouss kontente.
Iha fatin hanesan Enkaregadu Negósiu Tom Daley, kontente tebe-tebes hodi simu voluntáriu Korpu da Pas sira hodi fahe momentu furak ida ne’e. Nia dehan, voluntáriu Korpu da Pas reflete Estadus Unidus Amérika nia ideal sira ne’ebé mak aas liu.
Diplomata ne’e, agradese ba Korpu da Pas nia servisu, Timoroan rihun ba rihun iha Timor laran tomak hetan tiha ona treinamentu hanesan empreendedorizmu, empregabilidade, no lian Inglés. Abilidade hirak ne’ebé mak esensi hodi hadi’a prosperidade ekonómika Timor-Leste nian.
“Durante ita boot sira nia servisu iha Timor-Leste, ha’u enkoraja ita oot sira atu esplora nasaun ne’e no nia rekursu natural sira ne’ebé bonita, hosi tasi-ibun ne‘ebé mak sei original to’o foho sira ne’ebé furak no Timoroan nia kafé ne’eba naran boot tebes iha mundu no produtu orgániku. Ha’u hatene katak ita boot sira sei goza Timor-Leste nia istória no kultura ne’ebé riku, ospitalidade ne’ebé boot tebes, no domin boot hosi Timoroan sira hanesan ha’u sante,” Enkaregadu Negósiu Tom hato’o ba voluntáriu Korpu da Pas sira.
Nune’e, Prezidente José Ramos Horta hato’o ben-vindu ba voluntáriu Korpu da Pas sira ne’ebé to’o iha Timor-Leste ho misaun atu kontribui ba dezenvolvimentu Timor-Leste nian. Prezidente hato’o ba voluntáriu Korpu da Pas sira katak, Timor-Leste nasaun ida hakmatek tebes, tanba ne’e lalika taridu ho sira nia prezensa iha komunidade.
“Ha’u husu ba komunidade sira favor, tau matan ba ema sira ne’e, sira mai hosi dook, sira la iha interese seluk, ou ke responde ba pedidu hosi governu Timor, devidu hosi Prezidente Repúblika para mai servisu voluntáriu iha komunidade sira, entaun haree sira di’ak, purtantu koñese sira di’ak, tanba sira bele sai hanesan embaixador boa vontade ba Timor-Leste,” Prezidente Horta apela ba komunidade sira atu kopera ho voluntáriu Korpu da Pas iha sira nia komunidade.
