Home Meio Ambiente Komunidade Aldeia 12 de Outubro Konsumu Bee Masin, To’o Ohin Loron La...

Komunidade Aldeia 12 de Outubro Konsumu Bee Masin, To’o Ohin Loron La Asesu Bee Moos

308
0
ekipa klinika halo entrevista ho komunidade konaba bee moos. [Foto: Ekipa klinika jurnalismu | 03.10.2020]

Reportazen ekipa klinika jurnalismu UNTL-UNESCO

“Durante ne’e sira hadau malu bee moos, ema ne’ebe iha transporte bele ba kuru lalais, maibe ema ne’ebe laiha transporte, susar atu lao ho distansia dook”. Juvilina Lemos

Bee moos mak ema ida nia moris, bee moos nudar nesesidade fundamentu ne’ebe hatur ona iha Konstituisaun RDTL katak ema hotu iha direitu asesu bee moos ne’ebe dignu. Ohin loron tinan naruk nia laran, komunidade barak mak sei halerik ba bee moos, tantu iha Dili ou iha area rural.

Ekipa Klinika Jurnalismu UNTL-UNESCO halo observasaun direita iha suku Comoro, Aldeia 12 de Outubru ne’ebe realidade hatudu katak komunidade iha area refere la asesu bee moos no uza deit bee masi hodi sustenta sira nia nesesidade moris.

Komunidade Aldeia 12 de Outubru, Jenito dos Santos Basilio ba ekipa klinika jurnalismu hatete naturalmente komunidade Tasi Tolu maioria barak mak la asesu bee moos durante tinan naruk nia laran.

“ Ami  komunidade  sente tristi tebes bainhira hasai osan hodi hola rasik bee-moos  litru 1 ho presu 0.5 sentavus, atu nune’e augenta netik ba ami nia nesesidade loron-loron no ami mos uza de’it bee-masin tanba be’e moos mak importante tebes ba ema nia moris. Durante ne’e media barak mai kolia kona-ba bee moos maibe to’o agora ami nafatin la asesu ba bee moos,”hateten Jenito ba ekipa klinika jornalismu (28/09).

Alende ne’e bainhira sira atu ba kuru bee, sira lao ain ho distansia ne’ebé dook, hodi kuru bee-moos.

“Ami preokupa tebes bainhira bee moos sai tuir oras, normalmente oras tuku 17:00 lorokraik komesa loke no oras tuku 19:00 kalan bee komesa taka, entaun antes ne’e ami komunidade sira ne’ebé mak massa iha uluk torneira okos nia mak hetan, se ami ida ikus ami lahetan bee-moos no ami komunidade sira hadau malu de’it ba bee-moos. Ida ne’e halo  ami triste tebes maibe tenke simu tanba realidade mak hanesan ne’e”, tenik nia.

 Nia dehan maske komunidade barak hatoo ona ezijensia ba autoridade lokal sira, hodi prepara fila fali tanki para funsiona fali, tanba tina rua resik tanki refere abandona

Iha fatin hanesan Juvilina Lemos konfesa durante ne’e sira hadau malu bee moos, ema ne’ebe iha transporte bele ba kuru lalais, maibe ema ne’ebe laiha transporte, susar atu lao ho distansia dook

“Haree ba realidade ne’ebé iha, ami sente triste tebes tanba durante ne’e  ami  la asesu ba bee-moos, ho ida ne’e ami uza bee masin hodi haris no ami mós hasae rasik osan hodi sosa  bee hodi hemu hanesan massa litru 5/galon ida 50 centavos,”dehan nia.

Hatan ba preokupasaun problema hirak ne’ebé komunidade sira infrenta, ho ida ne’e  ekipa klinik jornalismu hakbesik ba Xefe Aldeia, Placido Marcal nia esplika katak enjeralmente komunidade barak mak la asesu bee-moos ,maske  fator importante ba ita nia vida moris.

“Ha’u hato’o ona proposta diretamente ba parte Agua no Saneamentu maibé proposta la konsege realiza, tanba razaun fundamental katak kanalizaun bee nian  konstrui mos estrada bo’ot tibar nian, kompania sira estraga tanba laiha mapamentu no difisil atu detekta kanalizasaun  atu dada  bee-moos”, dehan Xefe Aldeia 28/09.

Nia dehan durante ne’e seidauk to’o ba Ministeriu relevante maibe iha Diresaun Nasional serbisu Agua Saneamentu hakarak buat hotu la’o di’ak,  tenke  liga liu ba Orsamentu Jeral Estadu maibé orsamentu to’o agora seidauk

“Ami autoridade lokal iha Planu ba futuru 2020-2021 maka prioridade ba komunidade sira ne’ebé durante la asesu bee-moos, bainhira orden ne’e passa maka ami sei ba to’o iha Ministeriu relevante no diresaun nasional ne’ebé mak halo atendimentu ba bee-moos”,hatutan tan.

Total populasaun tuir folmulariu fixa familia no kartaun eleitoral oha suku Comoro, no fahe ba aldeai 14. Populasaun iha aldeai 12 de Outubro hamutuk 2852

*(Jorgina Menas Amaral, Joselina dos santos, Joana Alves, Lola Sarmento Ximenes no Leandro   Xavier amaral nudar estudante UNTL ne’ebe partisipa iha formasaun klinika jurnalismu UNTL-UNESCO no mentor publika iha Neon Metin)

Print Friendly, PDF & Email

LEAVE A REPLY

Please enter your comment!
Please enter your name here