Reportajen David da Costa
Kazu asédiu sexuál ne’ebe deskonfia dosente Matias ne’ebe halo pratika asédiu sexuál hasoru estudante feto iha iha Fakulade Ciensia Sosiais (FCS), Departamentu Poltikas Publikas (DPP) iha Universidade Nasionál Timor Lorosa’e, (UNTL), dosente MFB ne’e supende ona ba nia atividade orariu hanorin iha FCS, DPP UNTL.
Porta vos vitima husi Fakuladade Ciensia Sosiais, Departamentu Politika Publika UNTL, Francelino Koreia, hatete, kazu asédiu sexual ne’ebe maka deskonfia envolve husi dosente Matias iha Fakuldade Ciensia Sosiais no Departamentu Poltikas Publikas iha UNTL, halo ona supesaun ba atividade hanorin tanba kazu asédiu sexuál ne’ebe involve nia ne’e iha ona prosesu investigasaun.
“Dadadun ne’e dosente ne’e, sei supende ba nia atividade orariu ba hanorin nian, agora dadaun iha ona fase investigasaun husi konellu dispilinar nian,” dehan Porta vos vitima husi Fakuladade Ciensia Sosiais, Departamentu Politika Publika UNTL, Francelino Koreia, Liu husi Komfrensia Imprensa iha Kampus Kaikoli, segunda, 13/10.
Universidade Nasionál Timor Lorosa’e nu’udar instituisaun estadu ne’ebé sai hanesan espasu ba estuda, peskiza no dedikasaun komunitária, hodi dezenvolve siénsia, teknolojia no kultura iha Timor-Leste.
Tanba ne’e, UNTL tenke promove ambiente ida ne’ebe seguru, inkluzivu no ekuitativu, la iha toleránsia ba deskriminasaun no violénsia ho forma oioin kontra direitu ema ninian, liu-liu abuzu de podér, violénsia bazeia ba jéneru, violasaun sexuál, asédiu sexuál hasoru estudante feto sira.
Maibé Universidade Nasional Timor Lorosa’e, Fakuldade Siénsia Sosiais (FCS), Departamentu Politikas Públikas (DPP) estudante feto sira hetan asédiu sexuál husi dosente, ne’ebe hatuun sira nia dignidade, la sente seguru iha prosesu aprendizajen no balun lakon nia estudu.
Vitima sira denunsia ona predator sexual no infratór sira ne’ebe halo asédiu sexual no viola direitu vitima sira nian, maibé estrutura Universidade la prosesa lalais suspeitu sira, la iha trasparánsia ba rezultadu husi desizaun sira.
“Tanba ne’e, ami assosiasaun estudantes Fakuldade Siénsia Sosiais, iha UNTL, husu ba magnifiku Reitor no Konsellu Disiplinar atu kria komisaun inkéritu ida ne’ebe imparsial, indepedente no profisionál hodi investiga kazu asédiu sexual ne’ebe deskonfia dosente MFB iha FCS, Departamentu Politikas Públikas (DPP),” sira husu.
Maibé husu mos ba estrutura Universidade tenke iha trasparánsia ba rezultadu husi desizaun sira ne’ebe relativa ho kazu asédiu sexual iha FCS no DPP ne’ebe deskonfia husi dosente MFB ne’e.
Tanba ne’e estrutura Universidade atu aplika sansaun disiplinar ne’ebe todan ba predator sexual iha FCS no DPP. Universidade tenke enkamina kazu asédiu sexual iha FCS no DPP ba Ministeriu Públiku atu prosesa tuir dalan legál
“Se estrutura Universidade la kumpri ezijénsia sira iha leten mak ami assosiasaun estudantes Fakuldade Siénsia Sosiais, iha Universidade Nasional Timor Lorosa’e sei organiza estudante ativu no alumi sira atu foti asaun hasoru estrutura Univerisidade,”sira kontinua husu ba universidade,
Tanba Universidade fatin ba aprende laos fatin prostitusaun atu hakonu nesesidade sexual. La iha toleránsia ba asédiu sexual iha Universidade.
