Reportajen Filomena da Conceição
Diretór Ezekutivu Fórum Organizasaun naun Governamemtal (FONGTIl), Valentim da Costa Pinto, Rekomenda ba IX governu Timor-Leste, hodi lori fila Eis Minstra Finasas (MF) Emilia Pires mai iha Timor-Leste, tanba konsidera hanesan rekursu ne’ebé di’ak ba Timor-Leste, liuliu iha asuntu fundu Petrolíferu nian.
“Hanesan Sosiedade sivil rekomenda ba governu, tenke lori fila Emilia Pires, tanba ita konsidera nia iha kapasidade di’ak hodi kontribui ba funsionamentu sira liuliu ba asuntu espesifiku kona-ba Petroliferu, ha’u hanoin nia bele mai Timor para halo kontribui ninia matenek no kapasidade ne’ebé iha,” dehan Diretór FONGTIL Valentim, ba Jornalista sira iha Salaun FONGTIl, sesta, 04/08.
Nia haktuir, Timoroan hotu hatene, Emilia Pires iha kazu ida ne’ebé bo’ot nune’e Partidu polítiku no públiku sira kontinua kestiona, kona-ba kazu ne’ebé nia halo, bainhira ses husi Timor no ba hela iha Portugál. Maibé governu tenke esforsu hodi justifika mós kona-ba kazu Emilia Pires, ne’ebé la’o hela nune nia bele kontinua livre, hodi halo kontribuisaun ida ne’ebé di’ak ba Timor-Leste.
Maibé Sosiedade Sivil orgullu tanba Eis Ministra Finansas Emilia Pires hanesan Timor- oan ida ne’ebé mak matenek, atu kontribui ba Timor nia reseita mai husi fundu petrolíferu ne’e bele sa’e.
Nia husu ba Timoroan hotu tenke investe nia kapasidade no matenek ba rai Timor-Leste, tanba ne’e Emilia Pires hanesan mós Timoroan ida ne’ebé iha kapasidade di’ak no matenek nune’e, governu tenke kompleta lalais ninia estatuta legál hotu, karik Nia laiha indikasaun ruma bele kontinua kontribui ninia matenek ba fali Timor nia diak.
“Emilia Pires hanesan rekursu di’ak ida ba ba asuntu ekonomia no investimentu seluk, ha’u hanoin nia tenke fila mai Timor hodi bele kontinua fó ninia kontribuisaun ba ita nia rai” nia Afirma.
Maibé hanesan sidadaun tenke obedese ba desizaun sira husi tribunál no karik tribunál deside dehan Eis Ministra n’e la komete buat ruma, públiku tenke simu ida ne’e no karik nia komete tenke simu pena ne’ebé mak Tribunál fó.
