Reportajen Silvino Freitas
Deputadu bankada CNRT ho FRETILIN iha parlamentu nasionál preokupa ho estrada sira ne’ebé halo ona lansamentu maibé demora prosesu kontrusaun hanesan estada trosu Gleno ba Letefoho nune’e mos estrada Asalaitula ba Ossu ne’ebé pakote ho estrada diresaun Baucau ba Vikeke ne’ebé kompaña prontu ona atu kontinua maibé governu rejeita tenke halo fali estudu foun.
Deputadu Bankada CNRT Marcos Soares Martins dehan, estrada Gleno ba Letefoho dadaun nee polemika boot tanba isu kontraversial no laiha konkordansia ba malu ba kompaña ne’ebé atu kaer obra sira tanba ida hakarak kompaña seluk no ida seluk hakarak kompaña seluk, nune’e estrada sira ne’e sira dun ba malu entre ministeriu obras publika no MPIE tanba husi obras publika dehan demora iha MPIE no MPIE dehan demora iha obras publika.
“Sira rua humutuk dehan demora iha ADN, ne’e komplikadu ita ejiji malu hanesan deve malu lahatene povu mak deve ministru ka ministru mak deve povu” dehan deputada Marcos iha ninia intervensaun plenaria iha parlamentu nasionál, (16/12).
Nia dehan tan, MOP MPIE ho ADN tenke halo reflesaun tanba pasta ministeriu ne’ebé sira assume nee mai husi povu tanba ne’e tenke rona povu nia halerik liu liu konstrusaun estrada no eletrisidade nune’e halo dezenvolvimento tenke lao tuir prosedimentu legal nune’e labele sakrifika povu, tanba ne’e karik susar ba ministru sira atu foti desizaun entaun entrega ba primeiru ministro atu foti desizaun, tanba komprimisu ne’ebé durante ne’e halo atu tama ona tinan foun maibé seida’uk iha resposta ba estrada iha munisípiuErmera.
“Ida nee mak preokupasaun povu nian hein katak primeiru ministru rona netik povu atu iha tinan foun labele iha tan promesa maibé realidade no faktus iha terenu mak resposta ba povu nia preokupasaun” dehan deputada Marcos.
Sorin seluk deputadu bankada FRETILIN Dario Madeira dehan, governante sira tun ba terenu promete ba povu iha munisípiu Vikeke katak estrada diresaun Asalaitula Ossu ne’e too janeiru nee kaber ona maibé too dadaun ne’e seidauk remata nia konstrusaun, tanba estrada Asalaitula ne’e pakote hamutuk ho estrada ba Ossu ba Vikeke no Baucau maibé dadaun ne’e iha fali estudu foun.
“Halo estudu foun duni ka buka ema foun atu hetan buat ruma iha laran, ne’e mak hau sempre duvida ba ida ne’e kompaña hakarak atu kontinua estrada ne’e maibé governu mak la fo atu kontinua ne’e, hau la hatene estudu saida mak buka iha fatin uituan ne’e, keta halo ba buka persen karik hau tauk hanesan fali Ermera hotu tanba neeba nee desizaun iha tiha ona” dehan deputada Dario iha parlamentu nasionál.
Hatan ba kestaun ne’e Visi-ministru Asuntu Parlamentar Aderito Hugo dehan, estrada trosu Gleno ba Ermera ne’e grave kleur oan tanba ne’e Ministro Obras Públika halo ona lansamentu maibé tanba ministeriu mos halo hela esforsu ba ajénsia finanseiru sira tanba sira mos iha rekezitu nunee mos iha prosesu aprovizionamentu sira buka kompaña ne’ebé iha kapasidade atu kaer projetu tanba obra ne’e obra boot iha terenu ne’ebé laos fasil atu halo konstrusaun.
“Iha prosesu aprovizionamentu ida idak ho ninia prespetiva ADN CNA tanba sira haree kapasidade kompaña bele duni ka lae, imi hotu akompaña iha kompaña balun manan tiha tender tuir regra 30 dias ne’e mobilozasaun ekipamentu ba terenu maibé liu tiha 30 mobilizasaun mos la ba” dehan Visi-ministru Aderito Hugo iha parlamentu nasionál.
Nia dehan tan, prosesu aprovizionamentu ne’ebé importante liu maka ida Do Diligence ne’ebe halo husi tekniku sira husi ADN CNA, atu kompaña ne’ebé manan tender ne’e priense kritéria sira hanesan tuir rekezitu iha ekipamentu, tanba atu buka kompaña ne’ebé kualidade maka husi parte ministeriu relevante tenke haree buka kompaña ne’ebé kualidade maka husi preferensia ne’ebé la hanesan ba prosesu hili kompaña entre MOP MPIE ADN CNA tanba tenke halo aprovizionamentu Do Diligence.
“Dalan ida trosu Gleno ba Letefoho ne’e laos trosu bainbain trosu ne’ebé nia risku as tebes kuandu kompaña ne’e la forte laiha kapasidade kapital no esperénsia tanba ne’e ministeriu relevante sira sei emiti kompaña ne’ebé iha kualidade lae hanesan iha fatin sira seluk” konklui Visi-ministru.