Reportajen Silvino Freitas
Komisaun Anti Korupsaun (KAK) kompostu husi Unidade Informasaun Seguransa ho Servisu Investigasaun Kriminal halo buska no aprensaun ba Dirigente balun husi Timor Gap ho inisial AC iha ninia rezidensia privadu Kampung-Baru, aldeia 30 de Agosto suku Comoro, buska ne’ebé halo iha tuku 7:00 too tuku 9:00 dader, nune’e husi buska konsege foti karreta CountryMan-John Cooper Works ida inklui material balun ne’ebé sai evidensia ba krime refere.
Komisariu Intetrino KAK Miguel Acacio Faria dehan, buska ho aprensisaun ne’e halo tamba iha indisius ho krime balun ne’ebé dadaun ne’e iha hela prosesu investigasaun balun, tanba nee KAK halo buska hodi priende sasan eletronika balun ne’ebé iha relevante ba kazu refere.
“KAK nia servisu dokumentu ne’ebé relevante hanesan USB laptop komputador printer ne’ebé relevante” dehan Komisariu Interinu Miguel Acacio Faria iha nia knaar fatin Farol Dili, (17/12).
Nia dehan, tuir mandadu ne’ebé tribunál fo ba KAK mak atu halo buska no aprensaun ba evidensia material balun ne’ebé relevante ho kazu krime nune’e evidensia sira ne’ebé priende lori ka antrega kedas ba minisiteriu públiku hodi halo investigasaun.
Tuir obsersvaun ne’ebé Neon Metin nian iha residensia AC nian maka hahú tuku 7:00 dadersan halo buska nune’e lori sasan balun ne’ebé relevante ho kazu krime inklui karreta Country Man ida ne’ebé lori kedas ba edifisiu KAK iha Farol.
