Estudante Universitariu Timor Leste (EUTL) simu ona resposta pedidu audensia ho numeiru referensia TR/GP/XII/2025/098 husi Prezidente Tribunal Rekursu (PTR) Afonso Carmona katak nia liha kompetensia atu halo audensia ka komentariu ruma tanba nee kontrariu ho salvaguarda objetividade no imparsialidade neebe nia iha ho obrigasaun tuir lei, nunee estudante sira husu atu bele reposta lalais ho serteza ho fundamental legal no tuir EUTL nia ejijensia tanba sira nia prezensa iha tribunal rekursu ba dala 3 ona maibe ikus mak laiha desizaun sira sei fila ho asaun pasifika.
Portavoz EUTL Natalicio Nunes dehan, sira nia parte ohin loron 19 fulan dezembru atu hatoo pedidu konfirmasaun ba sira karta neebe submete antes konaba dialogu entre EUTL ho PTR maibe hafoin too iha too iha tribunal rekursu sira simu fali karta konfirmasaun ho eskrita husi PTR katak laiha kompetensia no pronunsia buat ruma konaba sira nia karta, tanba husi sira karta neebe hatama ona lei la permiti atu halo dialogu ho EUTL maibe sira nia hakarak iha resposta serteza ho fundamentasaun legal, nunee pedidu neebe sira submete ho pozisaun klaru katak tenke pronunsia kontituisionalidade ba revogasaun LPMV.
“husi karta nee PTR la koalia buat barak maibe hateten deit katak iha sirkunstansia ida nee nia laiha dispozisaun no kompetensia atu halo dialogu ho EUTL, maibe ita nia pedidu konfirmasaun nee ita husu nafatin tanba resposta neebe ita simu seidauk reflete ka kondiz ho pedidu refere” dehan Portavoz EUTL Natalicio Nunes ba jornalista sira iha adifisiu tribunal rekursu kaikoli, (19/12).
Nia dehan tan, pozisaun povu nian liuhusi EUTL nee klaru katak tenke halakon total LPMV tanba lei refere laiha benefisiu ba povu tomak maibe benefisiu deit ba ema minoria, tanba nee benefisiariu sira mak iha integridade moral kapasidade no sensibilidade ba estadu ida nee entaun labele goja mesak osan povu nian iha povu nia terus leten, kazu LPMV la nesesariu atu halo ida nee tanba lei refere laos rekonese husi ita nia konstituisaun signifika nee laos direitu fundamental diferensa ho direitu adkiridu neebe atribui husi lei no lei refere viola prinsipiu bem estar neebe hatuur iha ita nia konstituisaun.
“ita hateten katak lei nee kria tenke ba ema hotu prinsipiu igualidade neebe hatuur iha konstituisaun nee hatudu klar, ida maka igualidade kriasaun lei lei nee tenke kria ba ema hotu hotu, segundu igualidade aplikasaun lei ba ema hotu hotu laos aplika ba ema minoria hanesan pensaun vitalisia aplika ba ema minoria, terseiru oportunidade hanesan ba ema hotu laos ba ema politiku sira no politiku sira maka iha dignidade ba rai ida nee” dehan portavoz.
Nia konklui, tanba nee EUTL apela ba juiz primeira klasse neebe kaer prosesu refere hanesan eis PTR Deolindo, juiz Natercia ho juiz Duarte Tilman neebe sira maka kaer kazu refere tanba nee sira tenke disidi didiak tuir povu nia hakarak, nunee sira nia prezensa iha tribunal rekursu husu konfirmasaun hamutuk dala 3 ona karik desizaun ikus mak la tuir EUTL nia ejijensia maka ikus sira sei mai fali ho asaun pasifika hasoru tribunal rekursu.
