Reportajen Silvino Freitas
Edifisiu Provedoria Direitu Umanu no Justisa (PDHJ) muda provizoriu ba hotel Excelsior Resort iha praia dos coqueiros, tanba edifisiu iha kaikoli tama ona ba faze tenderizasaun atu halo konstrusaun foun, nunee PDHJ kontrata hotel Excelsior Resort iha praia dos coqueiros kada fulan ho osan liu $20,000 hodi uza provizoriu.
Provedor Virgílio Guterres dehan, eskritorio PDHJ nian provizoriu muda ona ba hotel Excelsior Resort iha praia dos coqueiros tanba edifisiu iha kaikoli tama ona ba faze tenderizasaun atu halo konstrusaun foun, nunee sira apresia desizaun governu nian neebe halo konstrusaun foun ba edifisiu iha kaikoli, iha edifisiu provizoriu foun iha hotel provedor ho nia adjuntu sira ho diresaun balun mak okupa edifisiu principal hotel nian no diresaun asistensia publika no investigasaun iha portaun entrada nian.
“tanba nee kaikoli mamuk ona kuandu prosesu konkursu hodi hetan kontrator hetan ona atu hahu ona konstrusaun” dehan Provedor Virgílio Guterres, iha edifisiu foun hotel Excelsior Resort iha praia dos coqueiros, (26/01).
Nia konklui, konstrusaun ba edifisiu foun nee ho orsamentu liu milaun 8 dolares Amerikanu, nunee ninia durasaun konforme ba kualidade edifisiu nunee importante ba sira maka iha edifisiu hodi halao servisu, nunee edifisiu provizoriu iha hotel Excelsior Resort iha praia dos coqueiros kontrata ho folin fulan ida ho osan liu rihun ruanulu dolares Amerikanu, nunee durante konstrusaun ba edifisiu foun lao sira sei uza hotel Excelsior Resort iha praia dos coqueiros hodi halo servisu PDHJ nian.