SOA Timor-Leste ofisialmente lansa atividade abertura ba programa Pre-Bootcamp nu’udar etapa estratéjiku ida iha implementasaun programa Ocean Heroes Bootcamp 2026, ne’ebé ho objetivu atu fornese introdusaun teóriku ne’ebé komprehensivu ba juventude sira kona-ba isu ambientál sira ne’ebé sai prioridade nasionál no global.
Liuhosi programa ida-ne’e, partisipante sira sei aprende kona-ba biodiversidade marina (jenétika, ekosistema no espesies), nia papel esensiál hodi sustenta komunidade sira-nia moris no ameasa sira ne’ebé dadaun afeta rekursu tasi hanesan poluisaun, peska la sustentavel no mudansa ekolojia, no mos impaktu husi mudansa klimátika ne’ebé aumenta vulnerabilidade komunidade área kosteira.
Iha tempu hanesan, programa ne’e mós enfatiza importánsia adaptasaun no asaun lokal, hodi kapasita juventude sira atu bele kontribui ativamente ba solusaun no reziliénsia ambientál iha sira-nia komunidade.
Atividade Pre-Bootcamp sei hala’o durante fulan ida (1), ne’ebé sei envolve oradór sira husi área tematiku oioin atu fornese perspetiva multidisiplinár no experiensia prátiku ba partisipante sira.
Fase ida-ne’e konsidera nu’udar fundasaun importante hodi prepara partisipante sira atu tama ba Bootcamp intensivu ne’ebé sei realiza durante loron tolu (3) iha Ilimanu, Subaun, Manatuto iha ne’ebé partisipante sira sei aplika diretamente teoria sira ne’ebé aprende ona liuhosi atividade prátiku iha kampu. Abordajen ida-ne’e refleta kompromisu programa nian atu integra koñesimentu teóriku ho implementasaun real, hodi asegura aprendizajen ne’ebé efetivu no sustentável.
Programa Ocean Heroes Bootcamp la’ós inisiativa foun, tanba iha tinan 2024 programa hanesan m’os realiza ho susesu iha Suco Vatuvou, Municipio Liquiça, ne’ebé hatudu impaktu pozitivu ba juventude no komunidade lokal. Iha tinan 2026 ne’e, hafoin liuhosi prosesu preparasaun ne’ebé rigorozu, inklui dezenvolvimentu proposta grant no avaliasaun husi parseiru sira, SOA Timor-Leste ikus mai hetan konfiansa no apoiu atu realiza tan programa ida-ne’e ho eskala ne’ebé boot liu. Benefisiáriu sira husi program aida-ne’e mak total estudante hamutuk 40 ho idade husi 14 – 24 ne’ebé mai husi eskola oioin iha Municipio Díli.
Realizasaun programa ida-ne’e bele akontese tanba kolaborasaun estratéjiku ho Plan International Timor-Leste no kontribuisaun husi Maun Kay Olok nu’udar Embaxador, ne’ebé kontinua promove lideransa juventude no asaun klimátika iha Timor-Leste. Kolaborasaun ida-ne’e hatudu importánsia parsería entre organizasaun lokal no internasionál hodi responde ba dezafiu ambientál no sosial sira ne’ebé komplexu iha tempu ohin loron.
Koordenadór projetu SOA Timor-Leste, Clélio Ilídio Xavier Gusmão, hatete katak inisiativa ne’e importante atu hasa’e konsiénsia no kapasidade juventude:
“Ami fiar katak edukasaun no envolvimentu juventude mak xave atu proteje ita-nia tasi no responde ba dezafiu mudansa klimátika iha futuru.”
Ho lansamentu programa Pre-Bootcamp ne’e, SOA Timor-Leste reafirma nia kompromisu atu investe iha juventude nu’udar ajente transformasaun ba protesaun biodiversidade mariña no reziliénsia komunidade hasoru mudansa klimátika.
