Reportajen David da Costa
Governu horseik liu husi Konsellu Ministrus aprova projetu Rezolusaun Governu nian, ne’ebé preve osan rihun 600 ba despeza, atu ezekuta iha ámbitu prosesu transladasaun restus mortais (isin-mate), hosi preladu katóliku sira ne’ebé hala’o knaar pastorál iha Timor-Leste, hosi Portugál mai Katedrál Dili.
Primeiru Ministru (PM) Kay Rala Xanana Gusmão, hateten, ohin hasoru malu ho Prezidente Republika José Ramos-Horta hodi informa kona-ba horseik governu aprova projetu Rezolusaun Governu nian ne’ebe atu transladasaun restus mortais (isin-mate) hosi preladu katóliku sira ne’ebé hala’o knaar pastorál iha Timor-Leste, hosi Portugál mai Katedrál Dili.
No governu tau ona osan valór másimu dolar Amerikanu rihun 600 ba despeza ne’ebé atu ezekuta iha ámbitu prosesu transladasaun restus mortais (isin-mate), Dom Jaime Garcia Goulart, Dom José Joaquim Ribeiro, Monseñór Martinho da Costa Lopes no Dom Alberto Ricardo da Silva.
“Horseik ami aprova tiha planu ba transladasaun restus mortais, Dom Martinho, Dom José, Dom Jaime ne’ebé ami aprova tiha ona, mais menus programa ne’e tenke tau osan prontu aprova tiha ona, tau osan,” Dehan Prirmeiru Ministru Kay Rala Xanana Gusmão ba jornalsita sira hapoin remata enkontru ho PR iha Palasiu Prezidensia Bairo-Pite, Kinta 2/04.
Tanba ne’e, sei halo jardim ida iha Katedral nia kotuk, nune’e Dom José, ho Dom Jaime ne’e uluk liu antes Timor-Leste ukun aan husi kedas Portugés nia tempu.
“Ita rekoñese katak, sira nu’udar bispu, bele ajuda ita sai sarani fiar Maromak buat sira ne’e hotu,” nia hateten.
Horesik iha Konsellu Ministrus aprova projetu Rezolusaun Governu nian, ne’ebé aprezenta hosi Ministru Administrasaun Estatál, Tomás do Rosário Cabral, ne’ebé determina valór másimu dolar amerikanu rihun 600 ba despeza ne’ebé atu ezekuta iha ámbitu prosesu transladasaun restus mortais (isin-mate) hosi preladu katóliku sira ne’ebé hala’o knaar pastorál iha Timor-Leste, hosi Portugál mai Katedrál Dili.
Desizaun ida-ne’e ho objetivu atu garante kondisaun nesesária hodi translada ba Katedrál Dili restus mortais (isin-mate) Dom Jaime Garcia Goulart, Dom José Joaquim Ribeiro, Monseñór Martinho da Costa Lopes no Dom Alberto Ricardo da Silva, nu’udar rekoñesimentu ba legadu espirituál, istóriku no nasionál husi figuras importante Igreja Katólika nian iha Timor-Leste.
Tanba ne’e, hein katak sira nia restus mortais (isin-mate) deskansa iha ema sira ne’ebé sira serbí ba nia leet, nune’e povu bele fó omenajen ne’ebé loos ba sira, nu’udar jestu rekoñesimentu ida ba knaar ne’ebé sira hala’o no legadu ne’ebé sira husik hela, ne’ebé hakat liu ámbitu relijiozu no sai parte hosi identidade nasionál Timor-Leste nian.
Rezolusaun Governu estabelese enkuadramentu finanseiru atu apoia despeza sira ne’ebé relasiona ho prosesu transladasaun, no mós serimónia fúnebre no omenajen ba restus mortais (isin-mate) Dom Jaime Garcia Goulart, Dom José Joaquim Ribeiro, Monseñór Martinho da Costa Lopes no Dom Alberto Ricardo da Silva.
Prevee mós katak obra konstrusaun, rekonstrusaun, reparasaun, rekualifikasaun ka konservasaun ne’ebé nesesáriu iha ámbitu prosesu ida ne’e sei hala’o hosi Ministériu Obras Públikas no Ministériu Planeamentu no Investimentu Estratéjiku, ho posibilidade rekursu ba Fundu Infraestruturas ba ninia finansiamentu.
