Reportajen David da Costa
Primeiru Ministru (PM), Kay Rala Xanana Gusmão ohin atualiza bá Prezidente Repúblika (PR), José Ramos-Horta kona-bá horseik iha reuniaun konsellu Ministru (KM) aprova ona projetu arkitetóniku bá Sentru Konvensaun Díli foun iha área portu tuan, iha Baía Díli nia sorin.
Nia dehan ida ne’e aprezenta husi Vise Primeiru Ministru no Ministru Koordenadór Asuntus Ekonómikus, Francisco Kalbuadi Lay, nia aprezenta dezenu iha modelu ualu, maibé hili makai da Ondas tanba Timor ne’e hanesan illa no tasi maka hale’u.
“Ha’u informa bá Prezidente Repúblika katak iha Konsellu Ministrus, Vise Primeiru-Ministru, Francisco Kalbuadi aprezenta modelu dezeñu hamutuk ualu. Iha rezultadu ikus hotu-hotu pur unanimidade hili mak ida ondas ne’e, tanba ita nu’udár illa ida, tasi hale’u tiha ita. Ne’ebé aprova tiha ona,” hateten, Primeiru Ministru bainhira remata enkontru semanál ho Prezidente Ramos-Horta, iha Palásiu Prezidente Nicolau Lobato, Bairru-Pite, kinta 09/04.
Tanba ne’e, iha konstrusaun bá Sentru Konvensaun Díli foun ne’e hetan apoiu makaas hosu Primeiru Ministru Malázia, Dato Seri Anwar Ibrahim ne’ebé tuir planu sei realiza iha antigu Portu Dili.
Nune’e mos iha fulan hirak bá kotuk ne’e, Dato Seri Anwar Ibrahim bainhira hala’o vizita mai Timor-Leste, nia mós vizita ona fatin konstrusaun Sentru Konvensaun Díli foun.
Antes ne’e mós Primeiru-Ministru Anwar haruka empreza estatál ida ho nia oan mane rasik mai Timor hakarak lo’os atu fó apoiu bá preparasaun Timor-Leste nian atu sai uma na’in bá simeira ASEAN iha 2029.
Entertantu iha horesik loron kuarta 8 abril 2026, iha reuniaun Konsellu Ministrus aprova projetu arkitetóniku ba Sentru Konvensaun Dili foun, hafoin análize bá propostas modelu arkitetóniku ne’ebé aprezenta hosi Vise Primeiru Ministru no Ministru Koordenadór Asuntus Ekonómikus, Francisco Kalbuadi Lay.
Projetu estruturante ida ne’e ho objetivu atu sai uma na’in ba reuniaun sira ASEAN nian durante Timor-Leste nia prezidénsia iha tinan 2029, inklui simeira Xefe Estadu no Xefe Governu sira nian, no mós eventu ho dimensaun boot sira seluk.
No sentru konvensaun foun sei harii iha área portu tuan, iha Baía Díli nia sorin, no sei inklui edifísiu prinsipál ida ho sala konferénsia, auditórius no pavillaun sira bá espozisaun.
Nune’e mós área komplementár sira lazer no turizmu nian, inklui paseiu ida hodi la’o iha kais nia sorin, akuáriu ida no sentru entretenimentu no komérsiu ida.
