Reportajen David da Costa
Deskonfia arguida sira ne’ebé envolve iha kazu alegadu Scam Call Centre iha área Ulmera, Munisípiu Liquiçá, hamutuk ema na’in-20 resin, alegadamente halai lakon husi hela fatin ne’ebé Tribunál determina atu sira hela durante prosesu investigasaun.
Tuir informasaun ne’ebé Neon Metin hetan, suspeitu na’in-20 resin ne’ebé deskonfia envolve iha atividade Scam Call Centre iha área Ulmera, agora sai ona husi hela fatin refere. Balun fila ona ba Indonézia, no balun seluk seidauk hatene sira nia paradeiru.
“Iha ne’e ema na’in-20 resin maka sai ona husi hela fatin. Balun fila tiha ona ba Indonézia no balun ba fatin ne’ebé ami seidauk hatene,” dehan fonte ida ne’ebé lakohi temi nia naran ba neon metin iha Ulmera Liquiça, kuarta 29/07.
Portavóz Polísia Nasional Timor-Leste (PNTL), Superintendente Xefe Polísia João Belo dos Reis, konfirma katak suspeitu balun iha kazu Scam Call Centre iha Ulmera halai ses husi fatin ne’ebé Tribunál Judisiál Primeira Instánsia Díli (TJPID) determina atu sira hela durante kumprimentu medida kausaun.
Tanba ne’e, informasaun ne’e mosu hafoin PNTL rekolla dadus husi Servisu Intelijénsia no komunidade katak sidadaun estranjeiru balun ho nasionalidade Indonézia, ne’ebé anteriormente PNTL detein iha operasaun kombate Scam Call Centre, agora la kumpre ona desizaun tribunál nian. To’o agora, arguidu sira refere seidauk depozita osan kausaun tuir medida ne’ebé tribunál aplika ba sira.
“Informasaun ne’e ami hala’o trekking hela parte Tibar ho Ulmera nian, sidadaun estranjeiru ho nasionalidade Indonezia sira ne’ebe Polisia detein iha fulan kotuk iha operasaun kombate Scam Call Centre nian hodi aprejenta ba Tribunal depois desizaun Tribunal nian haruka sira hela iha ne’eba atu prosesu ba selu medida kausaun no agora dadaun iha informasaun ne’ebe ami rekolla husi servisu informasaun no komunidade katak sidadaun balun dezvia ona fatin konsentrasaun no sira seidauk selu medida kausaun,” dehan Superintendente Xefe Polísia João Belo dos Reis ba jornalista sira iha konferénsia imprensa iha Kuartel Jeral PNTL.
Hatan ba situasaun ne’e, ekipa Diresaun Servisu Investigasaun Kriminál (DSIK), hamutuk ho Servisu Intelijénsia Polísia (SIP), kontinua hala’o operasaun rekolla informasaun no buka movimentu arguidu sira iha área Ulmera no Tibar atu asegura sira fila fali ba prosesu justisa.
Antes ne’e, TJPID aplika medida aprezentasaun periódika, proibisaun auzénsia no medida kausaun ba arguidu na’in-76 iha Ulmera ne’ebe envolve iha Scam Call Centre. Maioria tenke depozita osan kausaun hamutuk USD 2.500, no arguidu ida tenke depozita USD 10.000, alende kontinua ho medida Termu Identidade no Rezidénsia (TIR).
Tribunál mos fó prazu loron-10 ba arguidu sira atu depozita osan kausaun. Karik la kumpre obrigasaun refere, tribunál bele altera medida kausaun ba Prizaun Preventiva.
Entretantu, Ministériu Públiku akuza arguidu sira ho krime Jogu Ilísitu, Asosiasaun Kriminoza, Burla Informatika no Brankeamentu Kapitais, tanba deskonfia sira envolve iha atividade Scam Call Centre.