Reportajen David da Costa
Primeiru Ministru (PM), Kay Rala Xanana Gusmão alerta katak krime organizado, fraude dijitál no ameasa transnasionál seluk kontinua aumenta ho mobilidade global ne’ebé aas liu, nune’e Estadu tenke hametin kapasidade intelijénsia, kontrolu fronteira no kooperasaun entre instituisaun sira atu halo prevensaun no responde ho efisiénsia ba risku sira ne’ebé ameasa seguransa nasionál.
Tanba ne’e, Servisu Nasionál Intelijénsia Estratéjika (SNIE) no Servisu Migrasaun Timor-Leste (SMTL) asina Memorandu Entendimentu (MoU) hodi hametin kooperasaun institusionál, liu-liu iha área seguransa nasionál, jestaun migratória no prevensaun ameasa transnasionál.
Akordu ida ne’e estabelese kuadru kooperasaun formál entre instituisaun rua ne’e atu fasilita koordenasaun no partilla informasaun, hodi dezenvolve mekanizmu hamutuk ba prevensaun, análize no resposta hasoru dezafiu sira relasiona ho seguransa nasionál no kriminalidade transnasionál.
Iha komunikadu Ofisiál ne’ebe Neon Metin sita husi Media Gabanete Primeiru Ministru (PM) Kay Rala Xanana Gusmão, hateten katak, kooperasaun entre instituisaun Estadu sira sai elementu importante atu assegura resposta integradu hasoru ameasa sira iha tempu ohin.
“Memorandu Entendimentu ida ne’e reprezenta pasu importante iha reforsu kapasidade Estadu nian atu proteje seguransa nasionál, garante integridade fronteira sira no responde ho efetividade liu tán ba dezafiu emerjente sira,” Dehan PM Xanana iha serimónia asinatura Memorandu Entendimentu (MoU) entre Servisu Migrasaun Timor-Leste (SMTL) no Servisu Nasionál Intelijénsia Estratéjika (SNIE), iha eskritóriu SNIE, Palásiu Governu, tersa 28/07.
Gusmão haktuir, seguransa Estadu modernu la depende de’it ba kapasidade responde bainhira ameasa mosu ona, maibé presiza mós kapasidade atu halo antesipasaun, identifika risku, prodúz koñesimentu estratéjiku no koordena instituisaun sira ne’ebé responsável ba protesaun interese nasionál.
“Mobilidade umana ne’ebé aumenta iha mundu lori oportunidade ba dezenvolvimentu, maibé mós kria vulnerabilidade sira ne’ebé bele esplora hosi rede kriminál transnasionál, tráfiku ema, krime finanseiru, fraúde dijitál no kriminalidade organizadu,” PM Observa.
Tanba ne’e, Liu-hosi asina Memorandu Entendimentu ne’e, SNIE no SMTL sei hametin mekanizmu partilla dadus migratóriu no informasaun estratéjika ho responsabilidade, seguru no tuir prinsípiu legalidade.
Tanba ne’e, SNIE sei analiza informasaun sira ne’e hodi ajuda Estadu identifika tendénsia, avalia risku no apoiu prosesu tomada desizaun estratéjika. Enkuantu, SMTL sei iha papél importante ida mak atu rekolla no jestaun informasaun kona-ba entrada, saída, visa, permanénsia no movimentu migratóriu iha territóriu nasionál.
Xefe Governu mós subliña katak seguransa fronteira no protesaun interese nasionál la’ós responsabilidade instituisaun ida de’it, maibé responsabilidade kolektiva hosi Estadu tomak.
“Kontrolu migratóriu, intelijénsia estratéjika, seguransa interna, fiskalizasaun ekonómika, protesaun dijitál no kooperasaun internasionál tenke funsiona hanesan parte integradu ida hosi arkitetura seguransa nasionál,” Xefe Governu hateten.
Nune’e mós Gusmão apela ba instituisaun sira ne’ebé integra iha Sistema Integradu Seguransa Nasionál (SISN) atu kontinua hametin kultura kooperasaun, partilla informasaun ho responsabilidade no halo asaun hamutuk, tanba ameasa sira iha tempu ohin la respeita fronteira institusionál.
Iha fatin hanesan diretór Jerál SNIE, Longuinhos Monteiro, hateten MoU ida ne’e sai marka importante ida iha reforsu kapasidade nasionál ba antisipasaun no prevensaun ameasa, no konsolida kooperasaun entre órgaun Estadu sira.
Iha parte seluk, Diretór Ezekutivu SMTL, Komissáriu Polísia Jorge Monteiro, reafirma kompromisu instituisaun nian atu servisu hamutuk ho SNIE hodi hadi’a jestaun migratória no hametin mekanizmu kontrolu no seguransa.
Asinatura MoU entre SNIE no SMTL marka esforsu Estadu Timor-Leste atu harii sistema seguransa ne’ebé koordenadu liu tán, preventivu no preparadu hasoru dezafiu foun sira iha nível nasionál, rejionál no internasionál.
