Reportajen David da Costa Gusmao
Governu Timor-Leste liu husi Ministeriu Saúde (MS) ohin hahú halo lansamentu Nasionál vasina Pfizer ba labarik sira ho tinan 12 to’o 17 Iha Timor. Vasina Pfizer ne’e rekomenda husi Komisaun Independente MAITAK atu vasina labarik sira.
Ministra Saúde (MS), Odete Maria Freitas Belo hateten hamutuk iha fatin ida ne’e, hahú halo kampaña imunizasaun kontra Covid-19 ba labarik sira ho idade 12 to’o 17.vasina ne’e sei la fó ba ema ho idade 18 ba leten.
“Ami hakarak koalia kona-ba vasina ba labarik sira menus husi 18, tanba ita ne’ebé kompleta ona 18, ita iha vasina AstraZeneca ho Sinovac maibe ba iha idade 12 to’o 17, ita prepara vasina Pfizer ba alin sira ne’e, atu simu,” dehan Ministra Odete bainhira halo lansamentu ba Vasina Pfizer iha Eskola 30 Augusto Comoro, Kuarta 27/10.
Nia dehan konsellu Ministru Timor-Leste deside hodi vasina Covid-19 ba labarik sira iha Timor-Leste, bazeia ba rekomendasaun husi “Ita nia komisaun independente ida ne’ebé ami bolu MAITAK, vasina ne’ebé mak rekomenda mak vasina Pfizer”.
Vasina ne’e prodúz iha Nasaun Estadu Unidus Amérika (EUA), hetan aprovasaun husi Organizasaun Mundiál Saúde (OMS), iha loron 31 Dezembru 2020 ba idade 16 ba leten no hetan aprovasaun uza ba labarik sira ho idade 12 anos ba leten iha Maiu 2021.
Iha fatin hanesan Ministru Edukasaun Juventude no Desportu (MEJD), Armindo Maia hateten, virus Covid-19 ne’e laos kona ema boot deit, maibe kona hotu ema kiik, ho ida ne’e governu esforsu ona, ohin vasina to’o ona mai iha timor hodi fó vasina ba labarik sira ho idade 12 to’o 17.
“Ne’ebe ohin ita halo ona lansa ba vasina Covid-19 Pfizer ne’ebe mak ita nia belun diak husi governu Amerika apoiu ona mai ita hamutuk 100,620 dozes,” dehan Ministru Armindo.
