Reportajen ekipa klinika jurnalismu UNTL-UNESCO
Komunidade iha aldeia Namalai, suku Becora, postu administrativu Cristo Rei, Munisipiu Dili hasoru difikuldade iha sentru saúde, tanba klínika ne’e laiha pesoál saúde, ne’ebe hala’o serbisu permanent, hodi halo tratamentu saúde ba pasiente ka komunidade sira ne’ebe halo konsulta, ho situasaun ida ne’e afeta mos ba inan isin rua sira ne’ebe mak atu partu.
Hafoin ekipa estudante Komunikasaun Sosial Universidade Nasional Timor Lorosa’e (CS-SUNTL) vizita fatin refere, iha loron 4 Dezembru, dadalia ho komunidade Namalai, Marelino Mateus hodi hatene situasaun iha aldeia ne’e rasik.
Ba ekipa Marcelino hateten katak klínika ne’e harii tanba iha akontesimentu tinan kotuk liu ba, inan isin rua ida mate, tanba laiha klínika no pesoál saúde hodi halo atendimentu.
“Klínika ne’e harii iha loron 12 Maiu 2021, maibe Doutór sira mai fó konsulta ba komunidade sira semana ida dala 1 deit iha loron Qinta,” nia hateten ba Estudante Cs UNTL loron Domingo (5/12/2021).
Entretantu tuir observasaun estudante CS-UNTL hare iha terenu nota katak, postu saúde iha aldeia Namalai ne’ebe harii husi Forsa Militár Amérika, liuhusi USAID, maibé to’o agora seidauk iha pesoál saúde ne’ebé bele serbisu permanente iha klínika refere, hodi halo atendimentu ba komunidade sira.
Nu’une mós maioria komunidade sira iha ne’ebá moris ho agrikultura, ai-han hirak ne’ebe sira kuda no lori ba fa’an iha merkadu, hodi sustenta ba sira nia uma laran no selu oan sira nia eskola.
Alende ne’e komunidade sira iha difikuldade asesu estrada, tanba kondisaun estrada ne’ebe aat, nune’e transporte públiku labele halo movimentu to’o iha fatin ne’eba, nune’e komunidade sira uza deit ojek motor, ne’ebe ho presu $2.00
*(Ivonia Mendonça, Luzia da Costa no Carla Borges nu’udar estudante UNTL ne’ebe partisipa iha formasaun klinika jurnalismu UNTL-UNESCO no mentor publika iha Neon Metin)
