Reportajen Silvino Freitas
Asosiasaun dos Combatente Brigada Negra (ACBN) hamutuk ho movimento CRN1, MAPK no MNJP ezije ba Primeiru Ministru, Taur Matan Ruak atu propoin ba Prezidente Repúblika hodi ezanora imediata Ministru Administrasaun Estatál inklui nia Diretór Jerál Desentralizasaun, tanba la ordena levantamentu dadus no ordena atribuisaun kartaun eleitorál foun ba sidadaun sira iha Munisípiu Atauru.
Tuir portavoz Sancho Goncalves iha sede ACBN Balide hateten Ministeriu Estatál viola flagrante lei númeru 14/2021 7 de Jullu nian ne’ebé regula kona ba divizaun administrativu territóriu Timor-Leste nian iha rejiaun no munisípiu sira, tanba lei define ona Atauru nu’udar munisípiu iha territóriu Timor-Leste nian.
“Iha lei ba eleisaun prezidensiál iha artigu ne’ebé versa kona ba aprezentasaun kandidatura artigu 15 númeru 1 hateten katak, kandidatura sira sei aprezenta husi númeru mínimu ema rihun lima husi kada munisípiu sira, no labele iha balun maka reprezentadu de’it husi ema atus ida hanesan proponente” dehan portavoz Sancho liu husi konferénsia imprensa iha Sede ACBN Balide,(03/02).
Tuir nia iha eleisaun prezidensiál ne’ebé maka verdadeiramente demokratika tenke prosede kedas ezonerasaun ba Ministru Administrasaun Estatal no nia Vise-Ministru, Diretór Jerál Desentralizasaun, no Diretór governu lokál, no sira ne’ebe la kumpre regra ne’ebé liga ho troka diretór STAE husi munisípiu 10 nian, tanba ema sira ne’e iha tendénsia atu kria espasu ba sira hodi hamosu rezultadu eleisaun ne’ebé viola direitu sidadaun sira nian, no permite kondisaun dezenvolve frauda eleitorais.
To’o notísia ne’e tun jornalista Neon Metin sedauk halo konfirmasaun ho Ministeriu Estatal no Adminstrasaun (MAE)
