Reportajen Calisto dos Santos Oqui
“Timor-Leste sei la sai fraternu liu bainhira nia labarik no joven sira moris ho kondisaun saude iha mizeriu nia laran. Hau sei sai Presidente ida mak sei tetu didiak Orsamentu Estadu ida mak konta ho didiak dezenvolvimentu labarik no joven sira nian”. Virgilio
Kandidatu Prezidente Virgílio da Silva Guterres ‘Lamukan’ hahu nia kampaña dialogo RAEOA, iha postu Administrativu Pante Makasar, Suku Tai-Boko, Aldeia Nemon. Liuhusi diálogu ne’e Kandidatu ho numeru sorteiu 12, hateten katak sei tau importánsia ba juventude sira, tanba besik 50%, joven balun moris ho defisiénsia, balun la hatene hakerek no lee, dezenvolvimentu la inkluzivu nune’e la fo fatin ba maluk defisiénsia sira atu partisipa.
“Persentazen juventude mai husi idade kiik to’o idade adultu, barak mak moris ho mall nutrisaun, katak hahán ne’ebe sira konsume laiha nutrisaun, sei hau sai Prezidente sei koordena no koopera ho governu atu investe ba dezenvolvimentu juventude nian”, dehan Virgilio iha loron abertura, 02/03.
Virgilio dehan labarik sira iha direitu ba moris diak, moris saudavel, iha nutrisaun natoon, no merese iha futuru ida diak liu. Tuir dadus ne’ebe iha labarik sira mak moris hi krekas, tan la hetan nutrisaun diak 47% resin, nune’e situasaun sira ne’e afeta dezenvolvimentu fiziku no intelektual labarik sira nian
“Hau hakarak sai Presidente ida atu kurizi situasaun dezenvolvimentu labarik no joven sira nian. Timor-Leste sei la sai fraternu liu bainhira nia labarik no joven sira moris ho kondisaun saude iha mizeriu nia laran. Hau sei sai Presidente ida mak sei tetu didiak Orsamentu Estadu ida mak konta ho didiak dezenvolvimentu labarik no joven sira nian”, dehan Virgilio
Kandidatu Prezidente ho naran kódigu Lamukan ne’e dehan nasaun ne’e ba oin presiza investe ba dezenvolvimentu juventude nian, kria kampu traballu, kria sentru informasaun ba joven sira, nune’e sira hatene ka bele kria rasik kampu serbisu ba sira nia an
