Reportajen Joanina Casemiro
Kandidata Prezidente Repúblika ho numeru sorteiu 3 Ângela Freitas, sente triste tebes tanba maioria jerasaun millennial barak mak la hola parte iha loron votasaun, hodi fo votu sira nia direitu hanesan sidadaun Timor.
“Ita nia prosesu eleitorál ne’e ita la’o hanesan bai-bain, mais falta de preparasaun tanba estadu iha direitu para atu próteze no garantia sidadaun sira nia direitu, no respeitu prinsípiu direitu demokrátiku,” dehan kandidata Prezidente Repúblika, Ângela Freitas ba jonalista sira iha Sentru Votasaun Bairo Farmosa, 19/03.
Nia dehan ne’e duni lideransa sira tenke kumpre regra principals, primeiru respeita demokrasia, segundu respeita konstituisaun no respeita dereitus humanus. Tanba ema hatene katak prosesu eleisaun ida ne’e la dun preparadu tanba ne’e iha eleitor sira la partisipa no lamentavel tebes.
“Ita hare katak tempu ida ne’ebé badak aplika Votasaun paralelu, maibe ita la fo biban ba ita nia elitores sira atu rejistu no atu hola parte iha presta sira nia direitu iha Votasaun, Hau hanoin katak Instituisaun sira ne’ebe relevante ba prosesu eleitorál ne’e tenke hadi’a tanba ida ne’e ita viola ona direitu sidadaun tomak,” dehan Angela
Nia hatutan see ita hakarak atu hetan rezultadu ida ne’ebé kredivel tuir prosesu demokrasia, ita komesa ona tenke aprende ho demokratilizasaun atu nune’e ba futuru ita bele kontinua viola eleitór nia direitu.
