Reportajen David da Costa Gusmao
Governu liuhosi reuniaun Konsellu-Ministru aprova ona projetu Dekretu-Lei ne’ebé aprova rejime juridiku ba estabelesimentu sira ensinu superiór nian, aprezenta husi Ministru Ensinu Superiór Siénsia no Kultura (MESSK), Longuinhos dos Santos.
Porta voz governu, Ministru Prezidénsia Konsellu Ministru, Fidelis Manuel Leite Magalhães, hateten, Projetu Dekretu – Lei ida ne’e ninia objetivu mak atu hadia aspetu oioin, husi atual Rejime Jurídiku ba Estabelesimentu Ensinu Superior ( RJEES ) nian, ne’ebé estabelese husi Dekretu-Lei numeru 8/2010 , loron 19 Maiu .
“Entre alterasaun sira ne’ebé introdús, destaka aplikasaun konkreta husi rejime jurídiku kurrikulu padraun nasionál nian ba ensinu superior, ne’ebé tama ona iha vigór iha Timor-Leste liuhusi Dekretu-Lei numeru 3/2022 , loron 12 fulan – dezembru no konsolidasaun konseitu bináriu sistema ensinu superiór nian,” dehan Ministru Prezidénsia Konsellu Ministru, Fidelis Manuel Leite Magalhães, iha palasiu Governu 15/06.
Aleinde ida ne’e, introdús ona norma sira kona-ba asosiativismu estudantíl nian, antigu estudante sira, apoiu ba estudante sira iha ninia insersaun iha vida ativa no kona-ba figura provedór estudante nian, nune’e mós introdús regra sira kona-ba fuzaun, fahe ka transferénsia estabelesimentu sira ensinu superiór privadu nian, kona-ba rekoñesimentu interese públiku husi estabelesimentu sira ensinu superior no kona-ba fiskalizasaun no inspesaun ba instituisaun sira ensinu superiór nian.
“Ho sistema ida ne’e hatuur mós norma sira ba organizasaun estudante sira nian, no mos regulariza oinsá bele halo transferensia husi eskola ida ba eskola sira seluk, husi eskola privada ba eskola públiku, entaun hirak ne’e maka dekretu lei koko hatuur no regula,” porta voz Governu ne’e esplika
