Reportajen Joanina Casemiro
Akontesinentu ahi han Merkadu Taibesi mais ou menus iha tuku 11.00 kalan, halo komunidade nia uma 53 ahi han hotu, no vitima hamutuk ema nain 356. Vitima barak la konsege salva sira nia sasan, inklui Luis de Jesus Nunes.
Vitima insendu Iha Merkadu Taibesi Luis de Jesus Nunes konta tuir akontesimentu hodi kalan. Nia hatete iha kalan tuku 11.00, atu tama ba tuku 12.00, derepente rona ema hakilar ahi han uma. Luis halai sai hosi uma laran mai liur no la konsege salva sasan uma laran. NIa la biban hasai sasan tanba ahi han makaas loos.
“Hau hanesan vitima ba akontesimentu ida ne’e sente triste loos tanba kronolójia lolos hosi ahi-han ne’e ami seidauk hatene. Sasan uma laran la salva, ahi-han hotu, ha’u lori isin tanan mak halai sai. Sasan sira ne’e hamutuk ho osan $1.000 mak ahi-han hotu. Ha’u sai ho kalsa badak ida de’it, sasan tomak ne’e iha hela uma laran”, dehan, vitima insendu Luis de Jesus Nunes ho matan wen ba Neon Metin iha Merkadu Taibessi, Sexta 23/12.
Nia haktuir tan dehan nia servisu mai kolen entaun nia mai toba liu. Sira iha uma mak sei nonton entaun akontesimentu ne’e sira hanoin dehan problema ema baku malu iha liur. Ema balu dehan taka odaman, balu dehan taka ahi. Afinal lae, ahi-han uma iha kraik depois tutan mai leten. Atu halai sai mos la biban ona. Sai husi kuartu laran oan sira mos halai sai ho isin lolon no sira ida-idak foti nia dukumentu halai entaun halai tuir sira, sasan sira la aproveita hotu.
“Fuan ne’e triste no tanis tanba osan $1000 ne’ebé ahi-han ne’e ha’u hetan hosi fa’an modo, lafatik, bote, ne’e mak tau hamutuk. Maibe hodi kalan ahi-han osan sira ne’e mutuk kedas, tanba osan tahan deit la’os besi. Ha’u simu realidade ho fuan moras, lahatene iha futuru moris sai oinsa”, Luis espresa.
Ho ida ne’e nia husu ba iha parte relevante sira bele ajuda netik komunidade iha merkadu Taibesi hasoru ne’e.
