Reportajen Joanina Casemiro
Ahi han Merkadu Taibesi hodi kalan (22/12), ohin dader (23/12), Prezidente Autoridade Munisipiu Dili(PAMD), Guilhermina Filomena Saldanha Ribeiro to’o kedas iha fatin akontesimentu hodi halo observasaun no foti dadus kona-ba uma kain sira ne’ebé sai vitima no apoiu foos ba komunidade sira ne’ebé maka sai vitima ba insendu ne’e.
Presidente Autoridade Munisipiu Díli (PAMD) Guilhermina Filomena Saldanha Ribeiro hatete, hodi kalan bainhira akontese insendiu ekipa autoridade tun kedas no Diretór Jeral Dezenvolvementu Rural, Hosi Ministru tun akompaña mos Hosi Sekretariu Munisipal hodi hamutuk ho ekipa sira seluk hanesan Protesaun Sivil hodi halo atendementu ba komunidade sira ne’ebé sai vitima ba akontesimetu hodi kalan. Dadus provizoriu hamutuk 53 Xefe de familia ne’ebé registu no ho membru familia 536.
“Ohin ekipa ne’ebé apura fila fali dadus sira ne’e hodi bele hetan apoiu hosi parte ministeriu nian. Dadaun ne’e hetan ona apoiu foos hosi sentru logistiku nasional hamutuk 50 sakas no logistika munisipiu ba foti ona apoiu sira seluk hein Protesaun Sivil hodi haree saida mak sira bele halo entermus de apoiu ba dezastre”, dehan PAMD Guilhermina Filomena Saldanha Ribeiro ba joranalista iha Merkadu Taibesi, sesta 23/12.
Alende ne’e nia mos esplika katak iha ne’e la ko’alia uma, tanba fatin ida ne’e fatin merkadu entaun fatin ida ne’e hodi halo fila liman. Kona-ba uma nia asegura katak ne’e la’os uma maibé fatin ne’ebé komunidade sira mai buka moris iha laran.
“Ho ida ne’e, apoiu ne’ebé emergensia, tuir orientasaun sei haree dadus, ita nia ekipa tekniku hosi nasional nomós munisipiu, obras públikas ho planeamentu sira foti hela dadus atu bele oinsa halo lalais rekoperasaun ba ita nia komunidade para sira bele fila liman fali iha sira nia fatin merkadu ne’e. Agora buat hotu ho emergensia, saida mak bele halo ita hala’o dadauk. Ami hatene katak, hosi ita nia komunidade sira ne’e balun sira iha uma rasik, tanba ne’e merkadu hanesan atu fa’an sasan la’os merkadu hodi sai uma, ” Guilhermina hakruir nia.
Nia hatutan dehan iha situasaun tuir mai ne’e responsabilidade Protesaun Sivil sira mak bele halo maibé komunidade mós haree tanba tempu agora udan sira labele hela iha fatin ne’e. Ho ida ne’e ekipa autoridade Munisipiu Dili haree fatin privizoriu atu komunidade sira ne’e bele hela. Tanba Merkadu ne’e sira mai faan sasan laos mai hela. Autoridade buka hela fatin ne’ebé iha kondisaun diak no iha Be’e no sentru saude hodi vitima sira bele hela.
