Reportajen David Da Costa
Provedor Direitos Humanos e Justiça (PDHJ). Virgílio da Silva Guterres “Lamukan Fera Kakutak” iha nia mandatu tinan haat, iha providór ba PDHJ nian, sei tau asuntu feto importante iha nia programa hodi halo Komunika ho instituisaun relevante.
Virgílio da Silva Guterres “Lamukan Fera Kakutak” hateten, ba asuntu feto ne’e importante tebes, ba asuntu igualdade jéneru, asuntu abuzu sexual, ba labarik sira ne’ebé implika ema sira ne’ebé iha poder dala barak tauk atu halo Advokasia.
“Tanba ema sira envolve implikadu ne’e, iha podér, entaun ha’u fiar katak iha ne’ebá provedór sei lala’o mesak, provedór sei halo komunikasaun, koordenasaun ho Instituisaun konsellu sira hanesan HAK, CNC, ONG, no Sosiedade Sivil sira ne’ebé halo advokasia ba direitu labarik, direitu feto nian, konsellu komisaun ba direitu labarik nian mós sei servisu hamutuk atu haree ba asuntu sira ne’e,” dehan, “Lamukan” ba neon metin bainhira ramata Tomada de Posse iha Salaun Laline-Larigutu, CNE, Dili, 5/01
Alende ne’e Iha setór justisa nian, PDHJ tenke iha kapasidade natoon atu halo intervensaun hodi garante katak, sidadaun sira iha meiu sufisiente atu asesu ba justisa. asesu ba justisa implika sidadaun iha direitu ba espasu atu halo asaun judisiál, direitu atu asesu ba prosesu judisiál, no iha direitu atu hetan desizaun ida ne’ebé justu tuir tempu ne’ebé razoavel. Governu tenke garante katak defensoria públiku iha rekursu natoon atu fo asisténsia nesesária ba sidadaun sira ne’ebé presiza asisténsia legál perante justisa.
“Durante ha’u nia mandatu nu’udár Provedór, sei haka’as-an atu halo komunikasaun ho kooperasaun ho entidade sira, hanesan Comissão Anti-Corrupção, Comissão Nacional de Direitus de Crianças, Centro Nacional Chega!, Conselho de Imprensa, Comissão Função Pública no parseiru sira seluk, inklui ONG nasionál sira atu hamutuk halo advokasia ba defeza no promove Direitus Umanus. Ha’u sei buka hametin buat di’ak sira ne’ebé ha’u nia asesór sira halo ona no buka komplementa tan saida mak PDHJ tenke halo tuir Konstituisaun haruka,” nia haktuir.
