Reportajen David Da Costa
Brazil, 03 Janeiru 2023, Prezidente Repúblika José Ramos-Horta hasoru malu ho responsável husi Agência Brasileira de Cooperação (ABC), hodi ko’alia kona-ba kombate ki’ak no sub-nutrisaun.
Prezidente Repúblika José Ramos-Horta hateten, rekursu finanseiru mai husi exportasaun petróleu no gáz, maibé sei iha problema barak ne’ebé presija konsellu husi governu Brazil, hanesan nasaun ne’ebe iha esperiénsia ba luta kontra ki’ak, hamlaha no sai produtór mundiál ba alimentasaun.
“Ami la akonsella governu Brazil atu fó apoiu finanseiru, importante liu ba ami, mak konsellu tékniku, ajuda iha programasaun, luta kontra pobreza, halo Timor sai paiz agríkula, assegura seguransa alimentar, hadi’a no halakon sub nutrisaun infanti,” tenik Xefe Estadu iha komunikadu imprensa ne’ebé Neon Metin asesu husi Palásiu Prezidensiál Bairo-Pite, Sexta 6/01.
Tarefa ne’e, tuir Xefe Estadu, konta ho tulun husi Programa Mundiál ba Alimentasaun no UNICEF no parseiru seluk, hodi atinji meta ida ne’e ba tinan lima mai.
Prezidente Repúblika kestiona prezensa husi parseiru dezenvolvimentu iha baze, waihira situasaun pandémika afeta hela nasaun.
“Iha Timor-Leste pandemia deklara iha Marsu (2021), no iha Maiu, hanesan ex Prezidente, líder polítiku dahuluk ne’ebé rompe serka sanitária. ha’u la’o hale’u nasaun, maibé la haree prezensa osan, la haree prezensa husi governu, ONG internasionál, programa husi ONU no povu husik hela” nia subliña.
Diretór Agência Brazileira de Cooperação (ABC), Ruy Pereira mós aktualiza ba Xefe Estadu Timor-Leste kona-ba implementasaun programa iha Timor-Leste ne’ebé, monitoriza husi Ministériu Agrikultura no Peskas no Programa Mundiál Alimentus (PMA).
“Projetu ne’e foin dahuluk, ami halo iha Timor-Leste (Atabae – Bobonaro), la’os de’it ajénsia humanitária, maibé atu rekonstrui kapasidade produsaun unidade ki’ik sira iha aldeia, ho formasaun téknika husi Brazil no programa ida ne’e importante bá seguransa alimentar no nutrisional, ne’ebé sai hanesan preokupasaun bo’ot iha Timor-Leste” relata Ruy Pereira.
Prezidente Republika José Ramos-Horta mós husu hanoin husi Agência Brasileira de Cooperação (ABC) kona-bá programa merenda eskolar iha Brazil.
Ajénsia ne’e haktuir katak, kustu refeisaun bá kada alunu iha Brazil, sita ona iha Sistema Nasionál Alimentasaun no Governu Federál komplementa de’it finansiamentu ba alimentu suplmentar ne’ebé Munisipiu sira prepara no kada tinan orsamentu bá kategoria rekursu suplementar, totaliza real billaun 4, ekivalente ho dolar amerikanu liu millaun atus hitu.
Durante ne’e, Brazil hetan apoiu orsamentu husi Programa Alimentar Mundiál (PMA) iha Dili ho dólar amerikanu rihun 120, bá asaun kooperasaun humanitária, hodi rekupera atividade subsisténsia hafoin passajen siklone iha tinan hirak liu bá.
Entre tinan 2006 to’o 2016, rejista asaun 7 iha assisténsia humanitária ho Timor-Leste ba Koordenasaun-Jerál bá Kooperasaun Humanitária no Kombate hamlaha – CGFOME (Sigla iha Portuguéz) ho orsamentu dolar amerikanu liu rihun atus tolu.
