Reportajen David da Costa
Partidu Kongresu Nasionál Konstrusaun Timor (CNRT), ohin hato’o nia opiniaun ba Prezidente Republika (PR), Dr.José Ramos Horta kona-ba marka ba data eleisaun parlamentár 2023.
Prezidente Partidu CNRT, José Alexandre Kayrala Xanana Gusmão, hateten prezidente iha kalendariu ida ba audiénsia partidu sira, ho tan instituisaun sira seluk, ohin lorokraik bolu partidu CNRT.
Iha partidu CNRT iha nia estrutura másimu iha partidu laran maka Komisaun Politika Nasionál, hamutuk hodi reprezenta partidu CNRT hodi ko’alia kona-ba kalendáriu ba eleisaun parlamentar 2023.
“Prezidente iha kalendáriu ida ba audiénsia partidu sira, ho instituisaun sira seluk, tanba ne’e CNRT mai ko’alia kona-ba kalendáriu partidu politku no instituisaun sira seluk, kona-ba data atu marka ba eleisaun parlamentar 2023, ami hato’o ami nia hanoin no Prezidente mós ko’alia kona-ba ida ne’e,” dehan Prezidente Partidu CNRT, Xanana Gusmao, hafoin remata enkontru ho Ramos Horta iha Palásiu Prezidensiál, Bairo-Pite, Sesta 3/02.
Nia haktuir, haree ba situasaun sira ne’e hotu, CNRT halo apelu ida ba Prezidente Republika, katak tuir sékulu eleitorál kada tinan lima, sei iha 2018 halo eleisaun iha Maiu, entaun iha sékulu eleitorál tinan ida ne’e tenke halo eleisaun mós iha Maiu 2023.
“Ami mós rona, imi mós fó sai iha jornais buat sira ne’e hotu, membru governu balun ko’alia kona-ba eleisaun bele iha Setembru. Ne’e maka ami mai hodi hatudu katak Komisaun Politika Nasionál partidu nian, ami halo diskusaun iha ami sede, hodi haree karik ema sira ne’e iha razaun, maka dehan hanesan ne’e, ami sente kata laiha razaun, atu hadia tanba iha konstituisaun dehan mandatu 5 anos,” nia esplika.
Tanba ida ne’e maka Prezidente ohin rona ona CNRT nia opiniaun, no CNRT hein deit Prezidente, bainhira maka marka data eleisaun parlamentar 2023.
Alende partidu CNRT, Prezidente Republika halo ona konsulta ho partidu seluk ne’ebe iha asentu iha Parlamentu mak hanesan Partidu Uniaun Demokratika Timorense (UDT), partidu Frente Mudansa (FM), Partidu Unidade Dezenvolvimentu Demokratiku (PUDD), Partidu Kmanek Haburas Unidade Nasionál Timoroan (KHUNTO), Partidu Demokrátiku (PD) no Partidu Libertasaun Popular (PLP).
