Reportajen Silvino Freitas
Governu Japaun liuhusi Japan International Cooperation Agency (JICA) entrega no inagura sala ho fasilidade ba unidade ultrasonografia iha departamentu radiolojia, atu fasilita ba modalidade diagnostika HNGV (Ospitál Nasionál Guido Valadares).
Diretór HNGV Alito Soares hateten, HNGV iha tan progresu ida iha departamento radiologia unidade utrasonografia reabilitasaun no estensaun ba unidade refere, hodi fasilita HNGV liuliu iha modalidade diagnostico nune’e aumenta tan sala 3 ba 4 ne’ebé antes ne’e iha ona hamutuk sala 7.
“Sala ida ne’e hetan apoiu husi ita nia parseiru embaixada Japaun liuhusi JICA, konstrusaun ba edifísiu ida ne’e remata no utiliza iha tinan kotuk, maibé ohin mak foin halo serimónia inagurasaun no handover ba edifísiu ida ne’e” dehan Alito iha HNGV,(10/03).
Nia dehan, haree ba fali iha tinan 10 liu ba ita iha kondisaun ne’ebé limitadu tebes, sala ultrasonografia rua no tolu de’it, depois estensaun no doasaun ba sala sira ne’e husi doadór hanesan JICA ita iha ona makina ultrasonografia hamutuk 6 no sala ezaminasaun 7 ne’e ajuda tebes ba pasiénte sira ne’ebé durante ne’e hein to’o fulan ida no rua mak hala’o ezaminasaun ho razaun rekursu ne’ebé limitadu.
“Iha fulan rua nia laran ita hahú uza edefísiu ida ne’e ita laiha ona waiting-list ka pasiénte sira ne’ebé hein husi fulan ba fulan, ida ne’e hatudu progresu ne’ebé di’ak tebes” nia esplika.
Fatin hanesan, embaixada Japaun iha Timor Leste Tetsuya Kimura hateten, sente orgullu ba fasilidade sira ne’e, tanba bele halo espansaun ba sala ultrasonografia no emergency no renovasaun sala hein fatin nian no osan ne’ebé aloka ba fasilidade ne’e hamutuk $79.000.
“To’o ohin loron ami suporta ona sala emerjénsia no ultrasonografia nian, ba ami saúde mak prioridade hakarak atu suporta hodi promove seguransa umana ba povu Timor Leste”, dehan Tetsuya.
Nia dehan tan, husi parte Ministériu saúde mós rekomenda ona ba sira atu suporta sira nia master plan ba reabilitasaun edifísiu HNGV foun ne’ebé aprova ona husi governu, no embaixada Japan prontu atu suporta ida ne’e tanba ospitál nasionál mak sentru ba Timoroan atu halo konsulta ba saúde.
Entretantu Ministra Saúde Odete Maria Freitas Belo hateten, apoiu ida ne’e la’ós foun tanba governu Japaun apoiu fasilidade radiolojia no makina ultrasonografia nian, durante tinan ida tanba tempu ne’ebé limitadu tebes nune’e ohin mak halo inagurasaun.
“Ita nia tékniku no enfermeiru sira uza tiha ona fatin ne’e, ohin mak ita ingura no ita mós agradese ba ema nia apoiu ne’e” dehan Odete hafoin halo inagurasaun iha HNGV.
Odete konklui katak, fasilidade sira ne’e seidauk sufisiénte tanba Japaun apoiu USG tolu ba ita, ministeriu saúde mós sosa tolu no sei aloka nafatin osan atu sosa ekipamentu sira ne’e hodi tau iha kada sala enfermaria nian.
