Reportajen Filomena da Conceição
Asosiasaun Jornalista Timor Lorosa’e (AJTL) kolabora hamutuk ho Asia Pacific Boardcasting Union (ABU) no UNESCO organiza treinamentu konaba oinsa kombate no kontra liafuan odiu (hate speech) iha media sosial no mobile journalism
Presidente Asosiasaun Jornalista Timor Lorosa’e (AJTL), Zevonia Vieira hateten AJTL ho ABU-UNESCO realiza formasaun ne’e, ho objetivu atu minimiza liafuan sira ne’ebé maka ligadu ho rasizmu hanesan ne’ebe hateten aat ema nia kultura, rasa, relijiaun no hatún ema dignididade no estraga ema nia privasidade liu-liu iha media sosial
“Formasaun ne’e la’os ba jornalista sira de’it, maibé formadus balun mai husi organizasaun direitos humanos, Rádio komunidade difisiensia, rede ba rai, organizasaun luta ba justisa klimátika, hodi kolabora hamutuk kontra no halo kampaña konaba kontra liafuan odiu, liu-liu iha eleisaun agora”, dehan Zevonia iha Fundasaun Haburas Dili, 12/03.
Nia hatutan liuhusi formasaun ne’e atu fasilita partisipante sira konaba saida mak mobile journalism ka jurnalismu mobile, tanba iha era digital mobile sai hanesan tools ida ema barak hodi produs video ne’ebe bele halo advokasia no kampaña ba asaun sira ne’ebe importante, oinsa mos partisipa sira kria istória (telling story) ne’ebe bele hatudu valor diak sosiedade.
Iha fatin hanesan jornalista Ruben Conceição Silva nu’udar membru AJTL, hato’o nia agradesimentu ba treinadór Andi Muhyidin ne’ebe oferese ona nia tempu, hodi fahe formasaun ba jornalista sira, durante loron rua, konaba oinsa utilize mobile hodi kria istória no video sira hodi kombate liafuan odiu iha media sosial.
“Ha’u tuir formasaun durante loron rua, no liuhusi formasaun ne’e ha’u aprende ona buat lubuk ida, kona-ba oinsá atu utiliza telefone hodi kria istória no vídeo sira, hodi kombate liafuan ódiu iha media sosial , maské ha’u nia background la’os ema videographer no foto, maibé liuhusi formasaun ne’e ha’u bele aprende ona buat balun, tanba ne’e, ha’u la haluha hato’o ha’u nia agradese ba AJTL no treinadór Andi husi Indonesia,” dehan Ruben.
Entretantu, formasaun refere hala’o durante loron rua nia laran, hahú husi loron 13 to’o 14 Marsu, komopstu husi formadus nain 24 ne’ebe mai husi instituisaun media, organizasaun sosiedade sivíl ba advokasia, radio defisiénsia no PDHJ
