Reportajen Umbelina dos Reis
Asosiasaun Halibur Defisiente Matan Timor-Leste (AHDMTL) hetan vizita espesiál husi Premiadu Nobel da Paz, José Manuel Ramos Horta, iha edifísiu AHDMTL Manleu, hodi haree besik situasaun asosiasaun nian relasiona ho edukasaun inkluzivu, inklui sira prosesu iha sala de aula aprendizajen AHDMTL nian durante ne’e.
Iha vizita ne’e, Ramos Horta hatete katak lider rai doben Timor-Leste ida ne’e tenke esforsu ho polítika no atensaun espesiál, ba sira ne’ebé hetan diskriminasaun ba inkluzaun, ignoránsia no elementu balun ne’ebé vulneravel, ida ne’e presiza ajuda espesiál ba sira.
Ramos Horta hato’o, bainhira eleitu nu’udar Prezidente Repúblika tinan ida ne’e, nia sei konvida Diretór AHDMTL, Gaspar nu’udar asesór ida iha Palásiu prezidensiál hodi haree oinsá polítika sosiál, umanitária, edukasaun no la’os de’it ba ema ho defisiénsia, maibé ba ema hotu.
Nia hatutan tan katak, haree mos iha governu fatin espesiál ba ema ho defisiénsia, hodi kontribui diretamente ba diskusaun sira, Premiadu Nobel da Paz dehan la’os foin mak realiza knaar hirak ne’e maibé nia halo ona atividade internasional barak ba labarik sira iha situasaun funu no konflitu nia laran.
