Reportajen Adroaldo ‘Saretukau’
22 Fevereiru, Comissão Anti Corupução (CAC) selebra nia aniversáriu ezisténsia ba dala-XII, iha Salaun Laline Lirigitu, Comissão Nacional das Eleições (CNE), ho “Lansamentu Sistema Plataforma Online Konabá Deklarasaun Rendimentu Bens no Interese (DRBI),” ho forma ida atu impede poténsia sira ba prátika irregularidade no aktu ilegais iha prátika krime korupsaun no krime ekonomia finanseira, ne’ebé prejudika no kauza interese lezítimu públiku ne’ebé fo benefísiu de’it ba ema ka grupu ki’ik hodi hariku aan ho dalan ne’ebé la lezítimu.
Objetivu hosi DRBI ne’e mak proteje no dignifika integridade funsionáriu públiku nu’udar servidor estadu no integridade instituisaun públiku sira, atu limite aktu korrupsaun no prevene konflitu interese, atu deteta aumenta rikeza signifikativu no injustifikadu, no promove ambiente servisu ne’ebé mak livre hosi prátika korrupsaun no taka dalan ba oportunidade no risku korrupsaun.
Ámbitu komemorasaun aniversáriu CAC nian ba dala-XII, Komisáriu CAC, Sergio Hornai iha nia diskursu maktaka hato’o, CAC esforsu hodi kria ona sistema plataforma online ne’ebé CAC servisu hamutuk ho Tecnologia da Informação e Comunicação (TIC), I.P, Tribunal Rekursu hodi kria ona plataforma ida ne’e, ne’ebé antes ne’e uza hela plataforma offline. Nia dehan plataforma ida ne’e garante privasidade no seguru ba ajente deklarantes sira nia dadus pessoal.
“Ohin ita realiza plataforma ida ne’e, iha ita nia perkursu istória, los duni ida ne’e meius ida importante ba iha ita nia konsolidasaun, ba governante, ba iha boa governasaun, transparánsia, akuntabilidade iha ita ni-nia sistema dijitalizasaun iha era globalizasaun ida ne’e ni-nian,” Komisáriu CAC Sergio Hornai hato’o.
Nia hatutan hahú loron lansamentu nian ba oin, CAC sei notifika ajente deklarantes sira mak rejistu ona liu hosi plataforma online e-mail, “apartir de ida ne’e, iha pur volta 22 mil i tal deklarantes sei daklara, inklui entidades familiares nomos ba iha nia ema sira dependénsia ekonómiku sei halo deklarasaun ida ne’e, iha instituisaun 5. Entaun ho ida ne’e aban (23/02) ita boot sei simu notifikasaun dentru de prazu 48:00 horas ou 72:00 horas,” nia dehan karik la kumpri mak sei hetan aplikasaun de kuíma.
Ba deklarasaun ida ne’e sei deklara rikusoin sira hanesan bens móveis hanesan kareta, motorizada no seluk tan, iha bens imóveis mak, rai, uma no seluk, inklui ajente ida nia investimentu iha banku ka ba aktividade negósiu ruma.
