Reportajen Joselina dos Santos
Autoridade Nasionál Petróleu no Minerais (ANPM), ensera formasaun ba setor petróleu no minerais ba jornalista na’in 18 hosi media nasional ho atribuisaun sertifikadu partisipasaun nian.
Iha serimónia enserramentu Prezidente ANPM, Florentino Soares Ferreira agradese tanba bele fasilita ona formasaun setór petróleu no minerais ba jornalista sira ho di’ak, nune’e espera katak materia hirak ne’ebé fahe bele aumenta di’ak liu tan jornalista sira nia koñesimentu liu-liu halo kobertura kona-ba setor Petrolíferu no Minerais nian.
“Ita hatene katak setor petrolíferu no minerais ne’e setor ne’ebé ritmu tebes, estratéjiku ba dezenvolvimentu ita nia rai, tanba dala barak liu ami sente susar tebes atu transmite progresu dezenvolvimentu nomos situasaun sira ikus ba setor ida ne’e ba povu, maibé liu hosi jornalista sira ami fiar katak jornalista sai matan tilun ba povu hodi transmite informasaun ne’ebé loos bazeia ba asuntu petrolíferu no minerais nian”, dehan Prezidente ANPM iha enseramentu formasaun ne’ebé hala’o iha Salaun Aeroportu Internasional Kay Rala Xanana Gusmão, Covalima, 24/03.
Nune’e ANPM hakarak hatudu ba sosiedade sira katak setor petrolíferu no minerais ne’e hanesan setor transparente, entaun setor ne’e labele ba de’it servisu área petrolíferu no minerais nian, tanba povu iha direitu atu hatene tuir lia loos no progresu tomak ne’ebe eziste. Atividade ida ne’e kbiit ne’ebé ANPM oferese ba jornalista sira, espera katak sei kontinua servisu hamutuk iha vida real atu transmite informasaun sira ba povu.
Ba formasaun ne’e, jornalista Monica de Jesus agradese ba ANPM ne’ebé realiza formasaun ba jornalista sira atu nune’e bele aumenta sira nia koñesimentu no kapasidade iha área petrolíferu no minerais nian bainhira hakerek notísia liga ho setor ne’e.
“Iha formasaun ida ne’e ha’u hetan mak aprende materia lubuk ida kona-ba setor petrolíferu no minerais nian durante loron tolu nian laran no vizita kampu posu petrolíferu no minerais nian, espera katak liu hosi formasaun loron rua no vizita kampu posu sira ne’e bele aumenta ha’u nia kapasidade iha futuru mai”, dehan Monica.
