Reportajen David da Costa
Iha ambitu aniversáriu Polisia Nasionál Timor-Leste (PNTL) nian ba dala 23, no iha tempu hanesan Tomada de Posse ba Komandante Jerál PNTL Henrique da Costa no Segundu Komandante Jerál Pedro Belo, sira nain rua promete katak sei halo mellora jestaun instituisaun, haforsa lei no harmoniza lejizlasaun, hametin Kooperasaun institusionál, atividade sira ne’ebé atu mellora atendimentu ba públiku, no ikus liu maka Hametin Pás no Estabilidade Seguransa Interna.
Komandante Jeral Polisia Nasionál Timor-Leste (PNTL) Henrique da Costa hateten, ohin momentu ida hodi marka tan istória ba PNTL, tanba ohin loron nu’udar loron serimónia aniversáriu Polisia Nasionál Timor – Leste nian ba dala 23, no iha tempu hanesan Tomada de Posse ba Komandante Jerál no Segundu Komandante Jerál foun ba periodu 2023-2026.
“Ha’u no Segundu Komandante Jerál Pedro Belo hato’o ami-nia agradesimentu ba governu ne’ebé lidera husi Primeiru Ministru no Ministru interiór Jenerál Reformadu Taur Matan Ruak ba konfiansa ne’ebé deposita mai ha’u no ha’u – nia Segundu Komandante Jerál ba tinan tolu oin mai. Posto no Kargo ne’ebé agora ami hetan ne hanesan responsabilidade ida atu servi rai ida ne diak liutan. Ami husu atu ita kontinua tulun malu no tulun PNTL hodi servi ita nia povu di ak liután no garante pás no estabilidade ba rai ida ne’e “, dehan Henrique
nia hateten bainhira halo diskursu iha serimónia aniversáriu PNTL nian ba dala 23 no simu Tomada de Posse iha komandu UEF, Pairo-Pite, Segunda, 27/03.
Nia haktuir, ohin tinan 23 ona PNTL eziste no hala’o nia funsaun autónomu durante tinan 11 nia laran hafoin entrega poder husi Misaun Nasoes Unidas iha Timor – Leste iha 2012. Atu kompara instituisaun PNTL ho idade umanu nian, PNTL tama ona ba idade adultu. Hanesan idade ne’ebé adultu, ida-ne’e nu’udar idade formativu ida ba PNTL ne’ebé atu bele define PNTL nia karakteriztika no hamriik firme iha komunidade Timor – Leste nia leet.
“Ami aprende husi ami-nia istória dezenvolvimentu no dezafiu sira iha pasadu ne’ebé apar ba ami – nia ajenda estratéjiku atu kontinua dezenvolve PNTL sai maturidade. Durante ami nia mandatu tinan 3 nia laran , ami foti prioridade 5 atu implementa maka Mellora jestaun instituisaun no atividade sira hanesan; Haforsa lei no harmoniza lejizlasaun; hametin Kooperasaun institusionál; atividade sira ne’ebé atu Mellora Atendimentu ba Públiku no ikus liu maka Hametin Pás no Estabilidade Seguransa Interna,” dehan Komandante Jeral PNTL Henrique.
Nia hatutan tan iha nia mandatu tinan 3 ne’e, sei mellora jestaun instituisaun no atividade sira hanesan ajusta estrutura PNT tuir lei orgánika PNTL no estatutu, aselera prosesu preaposentasaun no pasajen ba aposentasaun ba sira ne’ebé prienxe ona rekizitu tuir estatutu PNTL, implementa sistema promosaun hodi promove ekuidade no diversidade tuir deviza hotu, no promove ofisial sira ne’ebé iha ona abilidade barak, implementa sistema rekrutamentu tuir lei ne’ebé halo PNTL husi seksaun hotu-hotu bele atrai sosiedade, dezenvolve kapasidade rekursu umanu, hodi apoiu ba profisionalizasaun instituisaun PNTL, promove partisipasaun feto iha pás , seguransa no toma desizaun iha PNTL no seluktan
“Ha’u sei ezije ba atividade sira ne’ebé atu mellora atendimentu ba Públiku; PNTL sei hasa’e vizivilidade iha públiku liuhusi patrulamentu la’o ain, motor, karreta no ró , hasa’e polisia nia prezensa iha fatin publiku no proativu iha área tarjetu sira ne’ebé sai risku aas durante iha loron no kalan no hasa’e involvimentu liuhusi atividade sira komunitária no involve komunidade sira iha atividade polisia nian”, nia hateten
Nia mos promete atu hametin paz no estabilidade segurasa interna liuhusi, manutensaun orden públika ho professional, habelar edukasaun sivika hodi hamenus infrasaun no asidente tránzitu, kontinua hametin sistema prevensaun no rezolusaun konflitu komunitáriu sira; Hametin pas no liberdade sidadaun sira nian inklui sira nia riku soin.
