Reportajen Joanina Casemiro
Asosiasaun Jornalista Timor Lorosa’e (AJTL) servisu hamutuk ho INTERNEWS organiza treinamentu seguransa dijitál ba membru AJTL sira, atu asegura aan iha era dijitalizasaun hanesan jornalista ida, ne’ebé foka ba modelu seguransa no protesaun ba komunikasaun wainhira uza plataforma dijitál sira.
Ba treinamentu ne’e, Prezidente AJTL, Zevonia Vieira hateten importante tebes ba jornalista sira, oinsá atu asegura-an liu hosi digital no iha internet ne’ebé bele fo risku liu-liu ba jornalista investigativu no ativista direitu umanus.
“Ita tenke asegura aan no bainhira uza platforma digital, ne’e importante ba jornalista no tivista sira. Iha nasaun seluk Sudeste Aziátiku , plataforma digital sai ameasa boot no hetan risku, liu-liu ba jornalista ne’ebe halo investigasaun, wainhira sira koko luta ba liberdade espresaun, iha media sosiál no uza plataforma dijital ameasa balun sira hasoru, hodi limiti sira nia espresaun”, dehan Prezidente AJTL iha nia diskursu ba jornalista sira iha resintu Radiu Liberdade, Hudi-Laran, Dili, 31/03.
Nia fo hanoin katak treinamentu konaba seguransa dijital fo hanoin ita, atu koidadu uza plataforma dijital, sosial media sira ho seguru hodi koidadu data sira ne’ebe iha, no komprende liután aplikasaun sira nebe seguru liu ba jornalista sira atu uza hodi halo serbisu ho seguru liu.
Iha fatin hanesan Prezidente Konsellu Imprensa (KI), Otelio Ote hateten, Konsellu Imprensa iha prinsípiu, apresia ba formasaun sira ne’ebé AJTL ho TLPU sira halo tanba sira nia parseria importante mak organizasaun sira ne’ebé Halibur Jornalista sira.
Nia enkoraja jornalista sira, atu tuir formasaun saída de’it tenki sai ema primeiru ne’ebé iha interese tuir, wainhira delega hosi instituisaun media ida-idak, tanba dala barak jornalista barak ladun iha interese partisipa formasaun sira.
Nia hatete ba jornalista sira atu labele mellora de’it sira nia talentu jornalístiku ba atividade kobertura, edisaun, maibé tenke mos eleva di’ak liu tan jornalista nia koñesimentu sai profesional ne’ebé ho intelektualidade ne’ebé aas.
“Entaun iha formasaun hirak ne’e no fo espesialidade kona-ba seguransa digital ne’e atu ajuda tan ita nia atividade jornalístika ne’e sai di’ak liu tan, tanba ohin Prezidente (AJTL) dehan atu segura la’os de’it ba ita nia dadus, asegura mos ema umanu. Jornalista ne’e hanesan ita bo’ot sira hatene sai ema figura ida ne’ebé públiku, hanesan mos artista no jogador bainhira ita halo ona notísia di’ak ema hotu gosta ita, wainhira ita halo notísia ne’ebé aat ema hotu sei buka ita, hatene ita ne’e se, mai hosi ne’ebé, buka to’o ita nia familia sira hotu,” tenik Prezidente KI.
Treinamentu ne’e hala’o durante loron rua (31 Marsu – 1 Abril) iha Rádiu Liberdade, Hudi-Laran, partisipa hosi membru jornalista AJTL ne’ebé servisu iha instituisaun media sira hanesan Neon Metin, SAP news, Rádiu Komunidade Difisiénsia Timor-Leste, Media Esperansa, Media Mudansa, Media Loluwari, Lafaek News, GMN-TV, Rádiu Liberdade no estudante estajiadu UNTL sira iha Rádiu Liberdade. Treinamentu refere fasilita hosi membru AJTL na’in rua, ne’ebé partisipa treinamentu Seguransa no Protesaun ba Komunikasaun Dijital iha Malázia ne’ebé mak organiza hosi INTERNEWS.
