Reportajen Umbelina dos Reis
Centro Nasionál Chega (CNC!), apoiu bolsu estudu ba sobrevivente no vulneravel nia oan, hamutuk na’in 12 nu’udar reparasaun hodi tulun sobrevivente sira ne’ebé laiha forsa no kbiit apoiu sira nia oan, atu hetan edukasaun iha nível ensinu superior.
Diretór Ezekutivu Centro Nasionál Chega, Hugo Maria Fernandes hateten, ohin halo serimónia atribuisaun bolsu estudu ba sobrevivente no vulnerável sira nia oan hamutuk na’in 12, atribuisaun ne’e bazeia ba dadus ne’ebé mak CNC hetan hosi asosiasaun vítima prizoneirus polítika, AJAR no ACbit ne’ebé durante halo akompañamentu ba sira nia inan-aman ne’ebé vitima hosi funu.
Nia dehan ba bolseiru sira katak, labele orgullu ou previlejiu ba sira maibé wainhira imi simu atribuisaun ne’e ema barak hirus ba ida ne’e. Entaun orgullu no pevilejiu ne’e ba funu na’in sira. Bolsa ne’ebé sira hetan ne’e hanesan todan ne’ebé sira tenki simu, uluk inan-aman simu sofrementu oi-oin, ohin loron liu hosi bolsu estudu ne’e oinsá oan sira hamorin nafatin inan-aman sira nia memória.
Diretór CNC enkoraja bolseiru sira katak hetan bolsu estudu ne’e tenki ba eskola tuir matéria no aprende ho di’ak, tempu livre ba vijita Centro Chega hodi tuir atividade no estuda istória pasadu nian. Ho koñesimentu di’ak konaba assosiasaun vítima sira nune’e kontribui ba memória pasadu nian.
Diretor Hugo hato’o, CNC nu’udar institutu públiku harii hosi estadu, nia mandatu ida mak haree ba sobrevivente sira nia oan ne’ebé komprimisiu boot hakarak kontinua estudu iha nível superior.
Nune’e tulun bolseiru sira hodi hakmaan inan-aman sira nia preokupasaun durante iha pasadu. Sobrevivente no vítima barak maibé la’os kondisaun mukit, alvu ne’e ba ema ne’ebé ukun aan tinan 20 resin ona maibé laiha kapasidade no finanseira atu tulun sira nia aan no sira nia família rasik.
“Bolseiru sira kada fulan hetan $150 hodi sustenta kobre ba sira nia nesesidade loro-loron to’o remata sira nia estudu iha nível superior,” nia hatete.
Iha fatin hanesan Diretora ACbit, Manuela Leong Pereira hateten, sente kontente tanba durante esforsu no halo advokasia servisu hamutuk ho Centro Chega, hetan ona rezultadu no bolseiru sira hetan ona bolsu estudu durante tinan 2.
“Orgullu tanba sobrevivente sira nia oan hetan bolsu estudu iha nível superior ho fundu ne’ebé sustenta ba nesesidade loro-loron nian,” dehan Diretora ACbit.
Nia dehan, hetan ona bolsu estudu tenki hatudu solidadriedade iha sosiedade ho kualidade iha nível superior nian, nune’e ema seluk mós respeita sira.
“Tanba uluk ACbit servisu hamutuk Fundasaun ALOLA fasilita mós bolsu estudu hanesan ne’e maibé susar ba alin sira atu halo solidariedade, depois hetan tiha osan mak ne’e ona, atividade ruma konvida mos la partisipa, haluhan tiha organizasaun sira ne’ebé apoiu, la’os obriga atu ajuda organizasaun ne’e maibé oinsá hatudu ezemplu ba públiku hodi hatutan programa ou istória ne’e“, Dehan Diretóra ACbiit, Manuela.
Reprezentante bolseira Alcina Maria Farmilha, hosi Universidade Nasionál Timor Lorosa’e (UNTL), Fakuldade Siénsia Direitu, Departamentu Direitu Jerál, oras ne’e tuur iha banku I anu, agradese no apresia ba oportunidade ida ne’e tanba nia mai hosi familia simples, maibé hakarak eskola iha nível superior, komu osan laiha entaun inan-aman fa’an hotu animal, osan kuaze $80 dolar sira fó nia hodi tama iha UNTL.
“Maibé grasas a Deus ha’u bele hetan bolsu estudu hosi Centro Nasionál Chega ne’ebé apoiu sobrevivente nia oan sira inklui ha’u. Oportunidade ne’e ha’u sei aproveita di’ak hodi aprende no luta ba ha’u nia futuru,” dehan Alcina ba Neon Metin iha Antigu Komarka Balide, Sexta-feira, 31/03.
Entretantu reprezentate sobrevivente Gracilia dos Santos ho kódigu ‘Merdeka’ hosi Munisípiu Ainaro, Suku Mauchiga, Aldeia Hatukeru, sente kontente no agradese tanba bolsu estudu ne’e hakmaan oi-tuan ona terus no susar iha pasadu, no sente orgullu tanba bele kura moras no triste ne’ebé durante luta iha pasadu. Sira husu nafatin ba governu liu hosi CNC! atu programa bolsu estudu ne’e labele to’o iha ne’e de’it, maibé kontinua nafatin programa ne’e para feto maluk sobrevivente nia oan sira ne’ebé mak sedauk asesu ba edukasaun iha nível superior sira mós bele hetan oportunidade refere.
Grasilia dos Santos nia esperansa, hakarak oan nia eskola remata iha nível superior, tan ne’e nia husu ba governu ou Centro Chega labele husik programa ne’e iha dalan klaran tanba sira laiha kbiit atu selu oan sira nia eskola ba futuru.
