Home Analisa Korupsaun Iha Perspetiva Povu Oprimidu

Korupsaun Iha Perspetiva Povu Oprimidu

613
0
hakerek nain Higino Guterres partisipa iha demonstrasaun. [Foto: Doc. privadu | 17.01.2022]

Hakerek nain Higino Guterres

Korrupsaun nu’udar krime ekstra-ordinariu ne’ebé da’et lalais liu, no akontese internasionalmente husi nasaun ida ba nasaun seluk. Korrupsaun sai ona krime ne’ebé sistemátiku no influénsia iha setór hotu iha sosiedade, hahú husi kapitál to’o ba nível aldeia.

Korrupsaun akontese ba ema ne’ebé iha poder boot, tantu iha poder politíku no ekonómiku. Ema ne’ebé iha poder, sira domina, eksplora no akumula rikusoin hotu estadu nian ba interese privadu, ne’ebé loloos pertense ba interese komum. Tan ne’e, korrupsaun akontese iha orgaun soberanu estadu nian, hanesan orgaun ezekutivu, judisiariu, legislativu no to’o ba setór privadu sira.

Korrupsaun akontese barak liu iha nível politiku ho forma oioin ba privilegia-an, familia, grupu, no partidu. Korrupsaun sai kompleksu liu tan, la’os de’it ona ba utilizasaun rekursu estadu nian ba pesoál ida nian. Maibe korrupsaun la’o ho meius politika akumulasaun oioin hanesan; a) kria lei ho salariu boot ba elite sira; b) kria lei ba elite politiku sira hodi privilegia patrimoniu estadu (karreta, motor, uma, osan pulsa, osan viajen, kombustivel no seluk tan); c) kria lei ba pensaun vitalisia; d) kria lei ba hatama familia, grupu, partidu no organizasaun iha servisu funsionariu públiku; no seluk tan.

Korrupsaun sei sai boot no luan ba beibeik hodi afeta ba krize ekonomia estadu nian. Povu oprimidu sira sei afeta direta hasoru krize halmaha, dezempregu, dekadénsia no mate. Korrupsaun fó ameasa ba estadu nia sustentabilidade, iha ne’ebé poténsia boot ba hasoru krize estruturál nivél áltu, hodi lori estadu sai hakiduk liu tan, inserteza no falla.

Korrupsaun husik sosiedade ba dezigualidade iha ekonomia nasaun nian hodi hamosu klase riku no ki’ak, bainhira estadu falla kontrola no uza sala sistema, nune’e permite ema oituan na’ok rikusoin no sosializa ki’ak ba ema barak. Bainhira sosiedade hasoru dezigualidade iha ekonomia, nia konsekuensia sei implika ba konflitu sosiál ida boot, tanba ema riku kontinua halo eksploitasaun hasoru ema ki’ak. Nune’e mós ho baze kompetisaun husi sistema ekonomia ne’ebé iha, entre ema riku ho riku no ki’ak ho ki’ak, sei lori to’o ba kecemburuan sosiál.

Korrupsaun sei husik naha todan ba futuru jerasaun. Oan no bei-oan sira sei tutur naha todan iha nakukun no dezesperadu tomak, bainhira elite politiku sira atuál delek no hatudu de’it ignoránsia totál ho bosok tomak. Tan ne’e, sem domin, asaun no determinasaun di’ak ohin ba jerasaun sira tuir mai, ‘prezente sei hatodan futuru’.

Korrupsaun afeta ba moras mentál sosiedade nian, tanba sistema bele restrutura sosiedade nia kan no satisfasaun ne’ebé rohan laek. Ema sei kontinua korruptu bainhira nia kan no satisfasaun la hotu. Epoka postu fordismu no postu-modernismu orienta ema nia pensamentu hotu ba osan (kapitál) duke ema (sosiál), tanba eziste iha sosiedade, ho idea dominante ida de’it, “osan mak buat hotu” no “buat hotu uza osan”, “osan mak tempu” no “tempu mak osan”. Tan ne’e, ema sei hanoin barak no lori to’o ba ‘hedonic depression’.

Korrupsaun sei labele kombate totalmente no kompletamente, bainhira elite politiku sira foti sai slogan ba materia kampaña eleitorál de’it, iha periodu besik eleisaun hodi konkista povu nia votu. Bainhira elite politiku sira rásik la konsientizadu ho hahalok korrupsaun nian, vizaun ba luta libertasaun povu sei konsidera nu’udar utopia konkreta ida. 

Korrupsaun sei labele kombate bainhira sosiedade, liu-liu povu oprimidu la konsientizadu hodi hili nafatin elite politiku sira ne’ebé la iha integridade aas, responsabilidade, domin no pozisaun ideologia ne’ebé klaru ba libertasaun povu. Bainhira sosiedade nafatin hela ho konsientizasaun ‘naif’ no fanátiku ba elite politiku no ekonomiku sira ne’ebé hatene de’it halo politiku sensu jestaun ba jere poder no projetu ba malu, sosiedade iha lalehan okos ida ne’e sei hakdasak, rugu-ranga/dizordem iha ne’e, agora no ba oin.

Tan ne’e, atu kombate totalmente hasoru korrupsaun nian, sidadaun hotu-hotu tenke to’o iha faze konsientizasaun krítiku hasoru virus aat ida ne’e. Labarik, joven to’o ema boot sira tenke edukadu no sivilizadu, katak iha kapasidade literasia lee, hakerek, análiza, interpreta ba realidade sosiál sira ho di’ak. Foinsa’e sira tenke iha baze koñesimentu filozófiku, psikolójiku no sosiolójiku ne’ebé krítiku, analítiku, di’ak no loos absolutamente.

Hatene katak, korrupsaun sai hanesan krime organizadu no estruturadu ne’ebé presiza mós luta organizadu, orientadu, sistemátiku no diresionadu ida, iha ne’ebé ezize entidade hotu nia partisipasaun. Foinsa’e ran manaas estadu nian hola papel hodi hateke dook, kle’an no hetan, lolo liman hamutuk iha idea komum ida vizionariu, idealistiku. Ho ida ne’e de’it mak bele harii sosiedade ida foun, feliz, no moos husi korrupsaun.

Luta hasoru korrupsaun nu’udar luta objetividade ba emansipasaun no prosperiedade povu nian. Hamutuk luta ho neon, no kbiit tomak ba ba justisa loloos no salvasaun rekursu povu oprimidu nian.

Antes remata, korrupsaun tuir pensamentu eskritór Kevin Bengyak iha nia livru Peculiar Dynamics of Corruption dehan “Corruption disproportionately hurts the poor and people otherwise economically disadvantaged in a country. Corruption adds insult to injury, coupling inefficiency losses with increasing inequality and equity problems”. Povu oprimidu sira sei laran kanek, susar, terus nafatin iha ekonomia, tanba elite politiku sira nafatin karii rai uut ba povu oprimidu nia matan ho bosok tomak iha kampaña eleitorál, no ne’e sei akontese beibeik hodi promove dezigualidade iha ekonomia.

*(Idea ne’e nu’udar koñesimentu jerál ne’ebé ita tenta introdus, hodi loke dalan ba diskusaun siéntifiku kle’an liu tan, ho artigu balun iha loron seluk)

Print Friendly, PDF & Email

LEAVE A REPLY

Please enter your comment!
Please enter your name here