Home Notisia ESPOZA PR APOIU KARTEIRA BA EBC MAU-META VILA

ESPOZA PR APOIU KARTEIRA BA EBC MAU-META VILA

52
0
Espoza Prezidente Repúblika Cidália Nobre Guterres, apoiu karteira unidade 30 ba Eskola Ensinu Báziku Central (EBC) Mau-Meta Vila Atauro. [Foto: Media PR | 18.09.2019]

Espoza Prezidente Repúblika Cidália Nobre Guterres, liu hosi Gabinete Apoiu Atvidade Konjúje Prezidente Repúblika apoiu karteira unidade 30 ba Eskola Ensinu Báziku Central (EBC) Mau-Meta Vila Atauro.

Inan-Nasaun agradese pedidu hosi Eskola EBC Mau-Meta Vila tanba hato’o ona difikuldade ne’ebé eskola infrenta liuliu fasilidade hanesan karteira.

“Labarik mak future inan-aman, sosiedade no future nasaun nian, maibé ita hatene labarik sira sei hasoru difikuldade kona-ba direitu labarik nian sei tau iha kestaun. Tanba atu hetan edukasaun di’ak, estadu tenke kria kondisaun di’ak ba nia oan sira, tanba kondisaun no fasilidade la to’o, sei afeta ba profesór sira atu hanorin no ba estudante sira atu estuda,” Inan-Nasaun, 17/09

Inan-Nasaun husu ba estudante sira iha Postu Administrativu Atauro no teritóriu Timor-Leste atu estuda maka’as, tanba nasaun nia future iha estudante sira-nia liman.

“Ita hakarak Ataurooan sira ba oin sai matenek, maibé tenke esforsa-an”, hateten Espoza Prezidente da Repúblika

Tanba ne’e, Inan-Nasaun husu ba estudante sira atu uja kadeira no meza ne’ebé iha ho kuidadu.

Diretór EBC Mau-Meta, Mariano Soares Saldanha, lori estudante no manorin sira naran, hato’o agradese ba Inan-Nasaun ne’ebé apoiu ona kadeira no meza.

“Ha’u hato’o agradese ba Espoza Prezidente Repúblika tanba apoiu ona kadeira no meza mai ami, hodi fasilita estudante sira bele hala’o prosesu aprendisajen ho di’ak,”.

Antes ne’e, Prezidénsia Repúblika apoiu ona fasildade hanesan ba eskola Ensinu Báziku Maukatar iha Munisípiu Covalima. * [Zevonia Vieira | Neon Metin | 18.09.2019]

 

 

 

 

LEAVE A REPLY

Please enter your comment!
Please enter your name here