Home Justisa PR Lú Olo: Ita Tenke Respeita no Iha dever Hakruuk Ba Desizaun...

PR Lú Olo: Ita Tenke Respeita no Iha dever Hakruuk Ba Desizaun Tribunal Judisial Sira

922
0
Prezidente da Republika, Dr. Francisco Guterres Luú Olo hatoo deklarasaun ofisial liga issue nasional ba jornalista sira iha palacio prezidensia. [Foto: Media Gabinete PR | 13.09.2019]

“Ita tanen interese nasional no interese publiku ho prosedimentu sira ne’ebe hatuur tuir lei sira, Laos ho asaun hosi ema ida ka grupu ida, biar lori mos ajentes instituisaun balun ba Estadu nian”. Lú Olo

Prezidente da Republika, Dr. Francisco Guterres Lú Olo hatoo deklarasaun ofisial relasiona ho intervensaun hosi personalidade publika, membrus governu nian, ajentes administrasaun publika no Polisia Nasional Timor-Leste, liga ho akontesementu kazu iha Portu Tibar.

Liu hosi deklarasaun, Prezidente da Republika deklara katak Prezidente nudar riin Estadu nian iha dever koalia momoos no loloos. Dever kaer metin estadu tomak no tau matan ba instituisaun demokratika sira nia lalaok, tuir ita nia Konstituisan haruka.

“Akontesimentu sira ne’ebe foin fo-sai ba ita hotu liu hosi ,meius komunikasaun sosial, liu-liu hosi televizaun, hatudu katak ita nia membrus governu, ajentes administrasaun publika no membrus PNTL la hatuir regras ne’ebe ita hatuur ba ita nia instituisaun Estadu sira konaba diresaun politika, komandu no administrasaun. Nune’e sira la hatuir Konstituisaun no Lei sira ne’ebe ita hametin ona ba ita nia Estadu. Deklarasaun sira ne’ebe foin sai liuba hatudu katak iha intensaun atu la tuir desizaun ida hosi tribunal”, hateten Lú Olo, iha palacio Prezidensia.

Xefe Estadu ne’e haklean liutan katak Akontesimentu sira ne’e hatudu momoos katak parte seluk ida tama iha klaran tanba sente iha kbiit atu resolve konflitu ida ne’ebe mosu entre parte privadu rua ne’ebe iha kontratu ka relasaun negosiu no prosedimentu ba resolve konflitu.

Relasiona publikasaun ne’ebe fo sai iha televizaun tuir Prezidente Lú Olo hatudu katak situasaun ida ho implikasaun todan oin-oin ba Estadu Timor.

“Ita Presiza hanoin klean oinsa hametin nafatin unidade, regras atuasaun ba instituisaun estadu sira. Ita hotu tenke respeita no iha dever atu hakruuk ba desizaun sira ne’ebe hatun hosi tribunal judisial sira”, deklara Lú Olo, 13/09

Hosi situasuan ne’ebe akontese Prezidente hatoo lia menon ba sidadaun no instituisaun sira, tuir kbiit ne’ebe Konstituisaun fo Prezidente da Republika, liu hosi artigu 75 no 86 alinea e, Prezidente haklaken katak tuir artigu 117 Konstituisaun RDTL, Primeiru Ministru maka kaer diresaun politika no administrativa no koordena mos Ministru sira nia knaar. Kada Ministru idak-idak nia knaar mak halao politika no lei sira ne’ebe aplika ba idak-idak nia Ministeriu.

Ba jornalista sira Lú Olo mos deklara katak husu ba Polisia tenke defende legalidade demokratika, proteje sidadaun no empreza sira nia direitu no sira nia prioridade, tenke kumpri no garante katak hotu-hotu kumpri desizaun ne’ebe hatun hosi tribunal sira, tene hakruuk ba KDRTL, liu-liu artigu 118, 119 no 121 ne’ebe refere ba tribunal sira.

“Ita tanen interese nasional no interese publiku ho prosedimentu sira ne’ebe hatuur tuir lei sira, Laos ho asaun hosi ema ida ka grupu ida, biar lori mos ajentes instituisaun balun ba Estadu nian. Ita hotu proteje no haree hamuutk oinsa hadia liutan funsionamentu ba ita nia Estadu de Direitu Demokratiku, atu bele sau efikaz no kompetente liutan, tuir lei ne’ebe iha”, hateten Lú Olo. *[ Zevonia Vieira | Neon Metin | 13.09.2019 ]

 

 

 

 

LEAVE A REPLY

Please enter your comment!
Please enter your name here