Reportajen Silvino Freitas
Partido Libertasaun Popular (PLP) nia programa prioridade mak hakarak muda sidade Dili sai sidade furak, liuhusi muda populasaun sira no universidade ba povu dezenvolvimentu iha Maliana, Same no Baucau bainhira muda sei fó kreditu ba universidade sira ho funan laiha.
Prezidente PLP Taur Matan Ruak hateten, daudaun nee populasaun sira iha sidade Dili hahú nakonu, maibe nia hakarak halo sidade Dili furak liu tan, entaun PLP hakarak sei hasai populasaun sira, nune’e dadaun nee portu Dili muda ona ba iha Tibar, hodi muda portu Dili ba fali pasajeiru ró nian, ró haksolok no ramelau tula ema sai no tama hatun iha neeba, nune bele fila fali fatin neba sai fatin turizmu boot.
“Universidade UNTL aban-bairua ba tiha Aileu, palásiu primeiru ministru nian, parlamentu nian no ministru sira nian aban bairua ba hotu metinaru” Taur promete liuhusi dialogu ne’ebé hala’o iha postu Atsabe munisípiu Ermera,(02/05).
Nia dehan, dadaun ne’e ba foho governu halo uma naroman ba povu no ba Dili dadaun estuda hela atu halo uma rihun rua iha hera, nune’e populasaun sira iha aitarak-laran palásiu prezidente no ministra finansa nia oin sei muda sira ba hotu hera no populasaun sira iha tasi-tolu ne’ebé ema nakonu iha ne’ebá ho familia rihun haat governu sei muda sira, halo uma hodi muda tanba tasi-tolu iha projetu bo’ot, atu halo fatin ne’ebá fatin furak hodi simu bainaka ba tomada de pose prezidénte nian.
Nia dehan tan, universidade sira ne’ebé privadu iha Dili hakarak sai governu fo apoiu ba sira hodi sai, tanba dadaun ne’e governu halo estudu ida ne’ebé hanaran polu dezenvolvimentu sidade nian iha Maliana, Baucau no Same.
“Karik universidade hanesan UNDIL se nia hakarak ba fatin 3 ne’ebé governu hili governu fo kreditu mais funan laiha governu mak selu funan, maibé eskola tenke ho kondisoens sala aula para labarik sira estuda professore sira hanorin ita nia oan sira ho mós rezidénsia ba estudante sira, tanba estudante sira hela iha kost kondisoens laiha para sira estuda, tanba klo’ot sena malu, sira hili fatin tolu nee governu fo kreditu ba sira ho funan laiha” Taur promete.
Maibé karik hakarak munisípiu seluk hanesan Ermera no Aileu sira sei selu mais funan ki’ik, maibé sira hakarak hela nafatin iha Dili sira sei selu-funan ne’ebé bo’ot liu, politika sira ne’e governu halo tanba governu ida ne’e nia prioridade primeiru mak ema segundu ema no terseiru ema, ema nia isin tenke di’ak nia saúde di’ak nia tenke moris naruk labele mate sedu, nune’e tenke tau matan ba nia, segundu nia tenke eskola domina siénsia no teknolojia ne’e liga ba edukasaun, tolu nia tenke moris di’ak iha rendimentu.
“Populasaun sira ne’ebé hakarak fila ba sira nia munisípiu, hanesan Aileu ba Aileu, Ermera ba Ermera, Baucau ba Baucau, governu ajuda para halo sira nia uma, la’ós hotu maibé ajuda bo’ot uituan para sira halo sira nia uma, maibé sira la ba hela iha Dili ami sei halo uma andar bolu dehan apartamentu, atu sira ba hela, nune’e sira kuandu sa’e andar leten maka fahi, bibi, asu hela hotu andar okos” nia konklui.
