Reportajen David da Costa
Governu liuhusi reuniaun Konsellu Ministrus (KM), Kuarta loron 3 Maiu ne’e, aprova ona projetu Rezolusaun Governu nian, kona-ba, alterasaun dahuluk Estatutu Komisaun Nasionál ba Fasilitasaun Komérsiu nian (CONFA ), ne’ebé aprova husi Rezolusaun Governu nian n. 6/2016, loron 17 fulan – fevereiru.
Iha projetu Rezolusaun Governu nian ne’e aprezenta husi Ministru Turizmu Komérsiu no Indústria (MTKI) José Lucas do Carmo.
Porta Voz Governu, Prezidénsia Konsellu Ministru (PCM), Fidélis Leite Mangalhães, hateten, Alterasaun ba Estatutu CONFAC nian daudaun ne’e ho ninia objetivu atu hadi’a, dinamiza no akompaña implementasaun prosedimentu sira ne’ebé relasiona ho fasilitasaun komérsiu tuir regra sira husi Organizasaun Mundiál Komérsiu nian (OMK ) no husi Asosiasaun Nasoins Sudeste Aziátiku nian (ASEAN).
Nune’e, Iha loron 27 abril ne’e, Konsellu Ministrus mós aprova ona projetu Dekretu Governu moan, ne’ebé aprezenta husi Ministru Turizmu, Komérsiu no Indústria, (MTKI), ne’ebé kria Sekretariadu Nasionál ba Adezaun ba Organizasaun Mundiál Komérsiu nian.
Porta Voz Governu ne’e, haktuir, Objetivu husi Sekretariadu Nasionál ba Adezaun ba Organizasaun Mundiál Komérsiu nian maka atu garante efisiénsia no efikásia ekipa téknika no sustentabilidade serbisu to’o adezaun efetiva país nian ba organizasaun no armonizasaun no adekuasaun sistema nasionál administrasaun no jestaun ekonomia nian ba norma regulamentár no padraun sira Organizasaun nian.
Estrutura proposta, ne’ebé sei depende ba membru Governu ne’ebé responsavel ba área komérsiu no indústria sei dirije husi Koordenadór-Jerál ida no sei inklui profisionál espesializadu iha área prinsipál iha ámbitu adezaun ba Organizasaun Mundiál Komérsiu nian, liuliu, iha asuntu komérsiu internasionál bens no servisu no propriedade intelektuál, no sei kompoin mós husi profisionál sira iha área apoiu tékniku administrativu no finanseiru, no ba monitorizasaun no avaliasaun.
