Reportajen David da Costa
Governu liuhusi reuniaun Konsellu Ministrus (KM), ohin Aprova mós projetu Dekretu Governu nian rua, kona-ba Planu Munisipál Ordenamentu Territóriu nian (PMOT) husi Bobonaru no Ermera
Iha projetu Dekretu Governu nian rua ne’e, aprezenta husi Vise – Primeiru – Ministru (V-PM) no Ministru Planu Ordenamentu Territóriu, (MPOT), José Maria dos Reis.
Porta Voz Governu, Prezidénsia Konsellu Ministru (PCM), Fidélis Leite Mangalhães, hateten, Planu Munisipál sira ba Ordenamentu Territóriu (PMOT) Bobonaru no Ermera nian ho objetivu mak atu estabelese estratéjia dezenvolvimentu territoriál no polítika munisipál ordenamentu territóriu no urbanizmu nian, nune’e mós define regra sira kona – ba okupasaun, uzu no transformasaun ba rai no kritériu sira ne’ebé atu utiliza iha ezekusaun ba Planu sira ne’e, hodi garante jestaun ne’ebé tau ona iha programa territóriu munisipál husi entidade administrativa lokál sira , tuir lejizlasaun ne’ebé vigora hela , ho uzu no kostume lokál sira.
“Planu hirak ne’e sai hanesan objetu husi paresér ne’ebé favorese ba Komisaun Konsultiva sira, ne’ebé atu akompaña atu elabora planu sira,” dehan Porta Voz governu, Fidélis Mangalhães, iha Palásiu Governu, Kuarta 3/05.
Nune’e, atu kumpre mós formalidade hotu – hotu ne’ebé ezije husi Dekretu – Lei n. 35/2021, loron 29 fulan – dezembru, ne’ebé aprova instrumentu sira kona-ba planeamentu territoriál.
