Reportajen Joselina Dos Santos
Forum Organizasaun Naun-Governamental Timor-Leste (FONGTIL), husu ba orgaun Administrativa Komisaun Nasional Eleisaun (CNE), atu tau atensaun ba Partidu politika sira ne’ebé envolve labarik no uza atributu Paridu Politika nian, iha tempu kampaña ho sansaun ne’ebé Rigor.
Liuhosi Konferensia Imprensa, Ofisial Advokasia FONGTIL Jorge Madeira hateten, Monitorizasaun ba Kampaña eleisaun Parlamentar iha 13 Munisipiu no RAEOA, FONGTIL deskobre ona lakunas sira durante kampaña. Aleinde mós sira hetan Kanpaña partidu polítiku balun iha Municipio Liquica, uza karreta Estadu balun ne’ebé uza husi ekipa PLP Nasional. Nomós iha Kampaña partidu Politika balun iha Munisipiu Lautem sira hetan Kareta estadu ida iha kampaña.
“Ami Husu ba Comisaun Nasional Eleisaun (CNE) atu bolu atensaun ba Partidu politika sira ne’ebé mak envolve Labarik no uza atributu Paridu Politika nian iha tempu kampaña ho sansaun ne’ebé Rigor ba Paridu sira”, dehan, Ofisial Advokasia FONGTIL Jorge Madeira, iha Salaun FONGTIL Kaikoli, Kuarta 03/05.
FONGTIL Husu mós ba Polísia Nasional Timor-Leste (PNTL), atu tau atensaun ba Militante no apoiantes sira ne’ebé iha kampaña la kumpre regas Transitu nian. Nomós halo vijilánsia makas ba Militantes sira ne’ebé iha Kampaña konsumu alkokol atu labele hamosu problema hodi distribui ordem públiku.
