Reportajen David da Costa Gusmao
Diretór Sentru Integradu ba Jestaun Krize, Brigadeiru Jenerál, João Miranda “Aluk”, hasoru malu ho Primeiru Ministru (PM) ,Taur Matan Ruak hodi atualiza ekipa rua ne’ebe maka apoiu ba Ministériu Saúde (MS).
“Hau mai hasoru Primeiru Ministru, hodi atualiza konaba ekipa rua ne’ebe harii, depois de disolve tiha sala de situasaun ba iha Primeiru Ministru,” dehan Diretór Sentru Integradu ba Jestaun Krize, Brigadeiru Jeneral, João Miranda “Aluk”, iha Palásiu Governu, Kuarta 6/07.
Nia haktuir ekipa apoiu ba Ministériu Saúde konaba implementasaun medida protokolares konaba covid nian, oinsa maka ema hotu iha konsensia hodi hetan vasina.
“Iha ema balun ne’ebe seidauk iha konxiénsia diak, hodi koopera ho MS para hetan vasina. Ekipa ida ne’e iha papél ho misaun apoiu Ministériu Saude hodi halo sosializasaun i implementasaun vasina iha ita nia pais,” nia esplika.
Ekipa ida seluk, atu apoiu mós Ministériu Saude konaba kontrola via entrada, tanba dala balun iha ema balun ne’ebe-ke la dun koopera ho MS liliu konaba implementasaun de medidas sira ne’e.
“Mezmu ke Ministériu Saúde atraves de konsulta ne’ebe maka halo, deteta katak nia hetan moras mas lakohi koopera ho MS para ba iha fatin izolamentu sira ne’e. Tanba ne’e maka kria ekipa ida ne’e apoiu MS, hodi kontrola ba iha situasaun sira ne’e,” Tenik nia.
Iha ekipa rua ne’e komposta husi Falintil-Forsa Defeza Timor-Leste (F-FDTL) no Polisia Nasionál Timor-Leste (PNTL).
“Hau mai aktualuza situasaun ida ne’e ba Primeiru Ministru, no Primeiru Ministru orienta katak kontinua lao nafatin, apoiu nafatin MS atu bele alkansa objetivu ne’ebe maka ita hakarak, no tenta para ema hotu hetan vasina,”. Hakotu nia.
