Reportajen David da Costa Gusmao
Governu ne’ebe lidera husi Primeiru Ministru (PM), Taur Matan Ruak, ohin liuhosi reuniaun Konsellu-Ministru aprova ona projetu proposta Lei konaba atu reforma funsionáriu públiku ho ajente administrativu ne’ebe maka idade tama ona iha 60.
“Hau rasik ohin propoin, aprezenta ba Konsellu Ministru proposta lei ida, atu halo autorizasaun lezilativa husi Parlamentu Nasionál hodi governu bele aprova dekreitu lei ba determinasaun limite idade ba relasaun servisu funsionariu publiku nian no ajente administrativu nian,” informa porta Voz Governu, no Ministru Prezidénsia Konsellu Ministru, Fidelis Manuel Leite Magalhães iha Palásiu Governu, Kuarta 6/07.
Governu hakarak ho projetu Proposta Lei katak Parlamentu Nasionál fó autorizasaun hodi fiksa limite idade hanesan kauza atu remata kontratu serbisu iha Administrasaun Públika . Bainhira atinje limite idade , funsionáriu públiku no ajente administrativu sira sei bele reforma no husu ninia pensaun vellise.
“Tanba tuir konstituisaun ba materia hirak ne’e, governu sei presiza hetan autorizasaun husi Parlamentu Nasionál, antes governu avansa ho inisiativs rasik liuhosi forma dkreitu lei. Tanba ne’e maka ohin KM diskuite no deside katak governu sei hato’o proposta autorizasaun ida ne’e ba iha Parlamentu Nasional”, dehan Fidelis
Projetu Proposta Lei ida ne’e ho objetivu atu estabelese mekanizmu ne’ebé nesesáriu hodi permite rejuvenesimentu ( sai joven liu ) husi profisionál sira Administrasaun Públika nasionál nian , ne’ebé posibilita lori kompeténsia foun ba funsionalizmu públiku . Renovasaun ba kuadru sira iha Administrasaun Públika hanesan medida esensiál ida atu asegura melloria servisu sira ne’ebé presta ba populasaun.
“Obrigatoriu reforma ba funsionariu sira ne’ebe maka ho idade 60, ida ne’e para atu loke dalan ba sira ne’ebe iha ona sistema laran foinsa’e sira bele kontinua ba leten no mós bele fo espasu para karik ran foun sira atu tama sira bele tama. Maibe ita mos konsidera no anota katak iha prekupasaun balun ho hirak ne’ebe maka tama ona idade reforma sira nia instituisaun sei presiza,” hatete Fidelis.
Funsionariu sira idade reforma ona, maibe iha instituisaun sei presiza nian, entaun ida ne’e sira sei tama nafatin iha reforma, maibe Ministeiru ida-idak bele halo justifikasaun para bele hatama sira iha kontratu, loas ona iha funsionariu publiku maibe kontratu, ne’ebe maka ho durasaun renovavel kada tinan to’o iha tinan lima.
