Reportajen Silvino Freitas
Relasiona video ne’ebé viral iha média sosiál husi ema nain 2 feto no mane ne’ebé ameasa labarik feto estudante ho idade minoridade, sosiedade-sivil konsidera ne’e krime no autoridade seguránsa sira tenke kaptura hodi husu responsabilidade sira nian, enkuantu hahalok amesa ne’e krime públiku no fó impaktu ladi’ak ba mentalidade labarik nian, nune’e Instituto Nasionál Defende Direitu Labarik (INDICA) tenke prosesa nomós bele penaliza.
Tuir Diretór Forum Organizasaun Naun Governmental Timor Leste (FONGTIL) Valentim da Costa Pinto kafak, bainhira haree video refere nia rasik informa kedas ba iha ministeriu interior atu tau atensaun no labele husik situasaun sira ne’e atu akontese nafatin tanba situasaun sira ne’e bele akontese sentimentu ne’ebé la seguru bainhira hala’o movimentu ba eskola, karik hahalok ida halimar maibé ne’e ladi’ak ba labarik nia sentimentu iha dalan públiku, nune’e autor nain rua ne’e tenke deklara ba públiku atu labele repete tan iha futuru.
“Ne’e hatudu labarik sira ho mentalidade tauk tanba ita haree dalan ne’ebé nakukun movimentu labarak maibé ida hanesan ne’e inan-aman sei la autoriza nia ona sira atu ba eskola, labarik sira mós tauk atu ba eskola ho dalan ne’ebé dook ho fatin ne’ebé la dun iha movimento barak no sira la’ós hanesan labarik sira ne’ebé hela iha kapitál ne’ebé asesu ba informasaun barak hahalok ne’e afeta ba labarik nia mentalidade ne’ebé ladun seguru asesu ba eskola no halimar” dehan Diretór FONGTIL ba jornalista sira iha nia kna’ar fatin Kaikoli Dili, (27/06).
Nia dehan tan, husi família labarik nian tenke hato’o keixa atu bele hetan tratamentu tanba ne’e fó ameasas liuliu ba iha komisaun ne’ebé trata direitu labarik nian nune’e mós komisaun sira ne’e presiza hala’o asaun emediata ruma, tanba dadaun ne’e iha ona lei ne’ebé proteje direitu labarik sira nian, nune’e hahalok sira hanesan maskí halimar maibé labele tanba fó impaktu ba dezenvolvimento fiziku no mentalidade labarik nian, tanba ne’e autoridade sira bele kaptura hodi husu nia responsabilidade labele akontese iha futuru.
Sorin seluk Diretór Timor Leste Coalition for Education (TLCE) José Monteiru hateten, estadu tenke tau atensaun makaas hodi sosializa direitu labarik sira nian atu oinsá ema adultu sira bele kuidadu labarik sira, se lae asaun hanesan ne’e sei mosu no pior liu tan nomós ameasa ne’e krime bele penaliza tanba ne’e família hakarak halo keixa bele halo, nomós parte INDICA bele fó konsola ba labarik hirak ne’ebé hetan ameasa atu labele iha trauma ba eskola, ne’e viola direitu ema nian atu moris livre iha nasaun ida, viola direitu atu okupa espasu públiku sira lei hotu bandu no kodigu penal mós dehan hahalok ne’e krime tanba ameasa.
“Ameasa ne’e involve labarik feto ne’e krime públiku la presiza inan-aman no labarik keixa INDICA bele halo prosesu hasoru ema ne’ebé ameasa presiza seriu tanba ema hotu hakrak livre Timor Leste, ne’e fó implikasaun bo’ot tebes ba mentalidade labarik nian distánsia entre uma no eskola ne’e do’ok labarik hirak ne’e feto entaun sira trauma bele husik eskola” konklui Diretór TLCE.
